Озарбайжонда барча рус мактабларини ёпиш ҳақидаги хабар рад этилди

Озарбайжонда барча рус тилида таълим берувчи мактаблар ёпилиши режалаштирилаётгани ҳақидаги хабарлар ҳақиқатга тўғри келмайди. Бу ҳақда республика Фан ва таълим вазирлиги маълум қилди, деб хабар беради «РИА Новости».

Куни кеча Oxu.Az порталида мамлакатда рус тилида таълим берадиган мактаблар ёпилиши мумкинлиги ҳақида хабар берилганди ва бу маълумотни РБК’нинг бир мактабдаги манбаси ҳам тасдиқлаганди.

«Бу – ёлғон хабар. Бундай маълумотлар тарқатилганда фақат расмий манбаларга таяниш керак», – дейилади вазирлик баёнотида.

Бугун Oxu.Az порталида Озарбайжон Россия билан муносабатлар таранглашган бир даврда уч йил ичида мамлакатдаги барча рус тилида таълим берувчи мактабларни ёпишга қарор қилингани ҳақида хабар берилди. РБК манбаси ҳам бу маълумотни тасдиқлаган. Портал маълумотига кўра, рус тилида ўқувчи болаларнинг ота-оналарига мактаб билан мулоқот мессенжерлари орқали муассасалар яқин бир неча йил ичида озарбайжон тилига ўтиши ҳақида огоҳлантириш берилган.