30 йилдан ортиқ хизмат қилган ҳарбийлар пенсияси оширилади

Сенат ялпи мажлисида “Ҳарбий хизматчилар (ходимлар)нинг ва улар оила аъзоларининг давлат пенсия таъминоти тўғрисида”ги қонун муҳокама қилинди.

Мазкур масала бўйича Сенатнинг Мудофаа ва хавфсизлик масалалари қўмитаси раиси Қутбиддин Бурҳонов маъруза қилди.

Муҳокамада қайд этилишича, шу вақтга қадар соҳадаги муносабатлар собиқ Иттифоқ даврида қабул қилинган ҳуқуқий ҳужжатлар ҳамда айрим халқаро келишувлар асосида тартибга солиб келинган.

Янги қонун билан мазкур муносабатлар Ўзбекистон Республикаси Конституцияси ва миллий қонунчилик талабларига мувофиқлаштирилди.

Узоқ йиллар давомида ҳалол хизмат қилган, хусусан, календар ҳисобида 30 йилдан ортиқ хизмат қилган шахслар учун пенсияни ҳисоблашнинг энг юқори миқдори 75 фоиздан 100 фоизгача оширилмоқда.

Муҳими, мазкур ижтимоий кафолатлар фақат келгусида пенсияга чиқадиган ҳарбий хизматчиларга эмас, балки бугунги кунда пенсия олаётган, календар ҳисобида 30 йилдан ортиқ хизмат қилган ҳарбий хизматчилар, ходимлар ва уларнинг оила аъзоларига ҳам татбиқ этилади.

Қонунда ҳарбийларнинг оилаларини ижтимоий муҳофаза қилишга ҳам эътибор қаратилган.

Жумладан, ҳарбий хизматчи хизматни ўташ даврида ҳалок бўлган ёки хизмат даврида олган жароҳати ёки касаллиги оқибатида вафот этган ҳолларда унинг оила аъзоларининг давлат томонидан пенсия билан таъминланишига оид кафолатлар мустаҳкамланмоқда.