ДХХ ҳудудларда гиёҳвандлик ҳамда кучли таъсир қилувчи дори воситаларининг ноқонуний айланмасига чек қўйди

Маълум бўлишича, Давлат хавфсизлик хизмати Сирдарё вилояти бўйича бошқармаси ходимлари томонидан ички ишлар органлари билан ҳамкорликда Оқолтин туманидаги “Сардоба” ЙПХ масканида тезкор тадбир ўтказилган. Унда “Тошкент-Жиззах” йўналишида ҳаракатланаётган Жиззах вилоятининг Бахмал туманида яшовчи, муқаддам судланган шахс бошқарувидаги “Кобалт” русумли автомашина тўхтатилиб, кўздан кечирилган. 

Натижада, автомашина юкхонасига 3080 дона “Регапен” номли кучли таъсир қилувчи дори воситалари яшириб қўйилганлиги аниқланиб, протсессуал тартибда расмийлаштириб олинган. Мазкур шахснинг жиноий шериги бўлган – Бахмал туманида яшовчи фуқаро ҳам қўлга олинган. Аниқланишича, ушбу дори воситалари Қирғизистон Республикасидан олиб келинган. 

Шунингдек, ДХХ ходимлари томонидан божхона органлари билан ҳамкорликда Фарғона шаҳрида ҳам тезкор тадбир ўтказилган. Унда Фарғона туманида яшовчи, муқаддам судланган шахс Қирғизистондан келтирилган 2799 дона “Регапен” кучли таъсир қилувчи дори воситаларини 65 млн сўмга сотган вақтида ушланган. 

Фарғона вилоятида кузатилган яна бир ҳолатда, Фарғона туманида яшовчи, муқаддам судланган шахс “ўзбек-қирғиз” давлат чегарасида белгиланган тартибни қўпол равишда бузиб, Қирғизистондан 5600 дона “Регапен” кучли таъсир қилувчи дори воситаларини олиб ўтган вақтида ашёвий далиллар билан қўлга олинган. 

Бундан ташқари, бу йўналишда ДХХ Хоразм вилояти бўйича бошқармаси ходимлари ҳам божхона идоралари билан ҳамкорликда тезкор тадбир ўтказган. 

Унда “Тошкент-Хоразм” йўналишида ҳаракатланаётган юк машинаси Ҳазорасп туманида тўхтатилиб кўздан кечирилганида, унинг юкхонасидан 1 кг 814 гр “опий” моддаси топилган. Ушбу қонунбузарлик Ҳазорасп туманида туғилган фуқаро томонидан содир этилганлиги аниқланган. Унинг яшаш хонадонида ҳам 158 гр “опий” ва 1 кг 988 гр “гашиш” моддалари борлиги аниқланган.

 
“Мазкур шахсни гиёҳвандлик воситалари билан таъминлаб келган, Сурхондарё вилоятининг Денов туманида яшовчи, 1989 ва 1991 йилларда туғилган 2 нафар фуқаро ҳам ушланиб, улардан бирининг яшаш хонадонидан 424 гр “опий” моддаси олинди. Ушбу ҳолатда наркотик моддалар Тожикистон Республикасидан олиб келинганлиги аниқланди”, 

дейилади ДХХ томонидан очиқланган маълумотларда. 

ДХХ Андижон вилояти бўйича бошқармаси ходимлари томонидан Қўрғонтепа туманида ўтказилган тезкор тадбирда, Андижон шаҳри томон ҳаракатланаётган “Нексия” русумли автотранспорт воситаси тўхтатилиб, холислар иштирокида кўздан кечирилган. 

Натижада унда йўловчи сифатида кетаётган 2 нафар фуқарога тегишли бўлган ва Қирғизистондан келтирилган 4 кг 861 гр “Прегабалин” номли кучли таъсир қилувчи модда борлиги маълум бўлган. Сўнгра тезкор тадбир давом эттирилиб, ушбу кучли таъсир қилувчи моддаларни қабул қилиб олган вақтида Андижон шаҳрида яшовчи шахс ушланди. 

Шунингдек, унинг танишлари бўлган Шаҳрихон туманида истиқомат қилувчи 2 нафар аёл ҳам протсессуал тартибда ушланиб, улардан 1 кг 987 гр “Прегабалин” моддаси ҳамда 1342 дона “Регапен” номли кучли таъсир қилуви дори воситалари олинган. 

Ҳозирда барча ҳолатлар юзасидан мазкур шахсларга нисбатан жиноят ишлари қўзғатилиб, қамоқ эҳтиёт чораси қўлланилган.