Ҳарбий ва идоравий формаларга ўхшаш кийим кийганлар жаримага тортилади

Жиноят кодекси 56-моддаси биринчи қисмининг “о” банди қуйидаги таҳрирдаги “о” ва “п” бандлари билан алмаштирилади:

“о) мастлик ҳолатида ёки гиёҳвандлик воситалари, уларнинг аналоглари, психотроп ёхуд кишининг ақл-идрокига таъсир қилувчи бошқа моддалар таъсири остида жиноят содир этиш;

п) ҳокимият вакили бўлмаган шахс томонидан ҳокимият вакилининг хизмат кийими ёки ҳужжатларидан фойдаланган ҳолда жиноят содир этиш”.

Маъмурий жавобгарлик тўғрисидаги кодекснинг 209-1-моддаси қуйидаги таҳрирда баён қилинади:

“209-1-модда. Вазирликлар, идоралар ва ташкилотлар ходимларининг формали кийим-бошини қонунга хилоф равишда кийиб юриш, ҳарбий ва идоравий формали кийимга ўхшаш формали кийим-бошни жорий этиш ва улардан фойдаланиш

Формали кийим-бош кийиб юриши назарда тутилган вазирликлар, идоралар ва ташкилотлар ҳарбий хизматчилари ҳамда ходимларининг тасдиқланган намунадаги ҳарбий, идоравий ва махсус формали кийим-бошини, шунингдек, ушбу турдаги формали кийим-бошининг фарқловчи белгилари ва (ёки) рамзларига эга формали кийим-бошини бундай ҳуқуққа эга бўлмаган шахслар томонидан кийиб юриш – формали кийим-бошни мусодара қилиб, базавий ҳисоблаш миқдорининг икки бараваридан беш бараваригача миқдорда жарима солишга сабаб бўлади.

Матосининг ранги, тикилиш услуби, фарқловчи белгилари ва бошқа предметлари ҳарбий ва идоравий формали кийим-бош предметларини такрорловчи ёки унга ўхшаш кийим-бошни жорий этиш ёки улардан фойдаланиш – формали кийим-бошни мусодара қилиб, базавий ҳисоблаш миқдорининг беш бараваридан ўн бараваригача миқдорда жарима солишга сабаб бўлади”.