Контрабандачилардан мусодара қилинган 267 дона қадимий танга ва тақинчоқлар Ислом цивилизацияси марказига топширилди

Яқинда Сурхондарё вилояти божхона бошқармаси "Сариосиё" чегара божхона пости ходимлари томонидан республика ҳудудидан 267 дона қадимий тангалар ва тақинчоқлар қисмларини ноқонуний йўллар билан олиб чиқишга уриниш фош қилинган.

Ушбу ашёларнинг қадимийлиги ва қийматини аниқлаш мақсадида ўтказилган бадиий экспертиза хулосасига кўра, 39 дона осма безак кўринишидаги кумуш тангалар ХIХ асрда Бухоро амирлигида зарб қилинган, 228 та тақинчоқ қисмлари эса ХIХ аср охири ва ХХ аср бошларига мансуб деб топилди.

Суднинг тегишли қарорига биноан давлат эгалигига ўтказилган тарихий буюмлар Божхона қўмитаси раисининг ташаббуси билан Ўзбекистондаги Ислом цивилизацияси марказига топширилди.

Шу муносабат билан Божхона қўмитаси раиси А.Мавлонов ва Ўзбекистондаги Ислом цивилизацияси маркази директори Ф.Абдухолиқов иштирокида тарихий-маданий бойликларни топшириш-қабул қилиш маросими бўлиб ўтди.

Тадбирда божхона органлари томонидан элимизнинг ноёб тарихий ва маданий бойликларини асраб-авайлаш йўналишида кенг кўламдаги чора-тадбирлар мунтазам давом эттирилаётганлиги таъкидланди.

Хусусан, бебаҳо ва ноёб маданий мерос намуналарининг ноқонуний равишда четга олиб чиқиб кетилишини олдини олиш ҳар бир божхона ходимининг бурчига айлангани эътироф этилди.