Самарқандда 310 миллиард сўмлик кўприк қурилмоқда

Самарқанд вилоятида Қорадaрё устидан ўтувчи, қиймати 310 миллиард сўмлик кўприк қурилмоқда. У янги «Ширин» массивини Самарқанд шаҳри ва халқаро аэропорт билан боғлайди.

Президент Шавкат Мирзиёев 18 октябрь куни қурилиш ишлари билан танишди. Бу ҳақда Президент матбуот хизмати хабар берди.

Кўприкнинг узунлиги 780 метр, кенглиги 29,8 метр бўлади. Тўрт полосали йўл кунига 25 мингтагача транспорт воситасини ўтказиш имкониятига эга бўлади.

Лойиҳа ишга туширилгач, «Ширин» массивидан шаҳар марказигача бўлган масофа 23 километрдан 4 километргача қисқаради. Йўлга кетадиган вақт эса 30 дақиқага камайиши кутилмоқда.

Кўприк транспорт оқимини тартибга солиш, йўллардаги тирбандликни камайтириш ва ҳаракат хавфсизлигини оширишга хизмат қилади.

Муаллиф: Ҳасанбой ОЧУН