Туркияда ўзбекистонлик аёл 4-қаватдан тушиб кетди

Дастлабки маълумотларга кўра, Наманган вилоятилик бўлган фуқаро ҳодиса юз берган пайтда Измирда яшаб келаётган бўлган. Ҳозирда у шифохонада даволанмоқда. Шифокорлар унинг аҳволи оғир эканини маълум қилган.

Аниқланишича, аёл Туркия фуқароси билан шаръий никоҳ асосида турмуш қурган, бироқ никоҳ расмий тартибда қайд этилмаган. Никоҳ маросими Наманган вилоятининг Чуст туманида ўтказилган.

Мазкур ҳолат юзасидан жиноий иш қўзғатилган бўлиб, айни пайтда воқеа тафсилотларини аниқлаш юзасидан тергов ҳаракатлари олиб борилмоқда.

Маълум қилинишича, вазият Истанбул шаҳридаги Ўзбекистон Бош консулхонаси томонидан назоратга олинган.

Аввалроқ Ўзбекистоннинг Анқара ва Истанбулдаги консуллари Туркия ИИВ Хавфсизлик бош бошқармаси Жамоат хавфсизлигини таъминлаш департаменти вакиллари билан учрашган эди.

Музокаралар давомида Туркия ҳудудида вақтинча ёки доимий яшаб турган ўзбекистонликлар ҳуқуқларини ҳимоя қилиш, шунингдек, бедарак йўқолган фуқароларни қидириш масалалари муҳокама қилинган.