Прокурор Мубашшир Аҳмадга 7 йил озодликдан маҳрум қилиш жазосини сўради

Суднинг навбатдаги мажлиси, кеча, 18 сентябрь куни давом эттирилди. Судя Бобур Раҳимов раислигида ўтган суд мажлисининг музокара босқичида давлат айбловчиси битта модда бўйича жарима, иккита модда бўйича қамоқ жазоси берилишини сўраб, Мубашшир Аҳмадга узил-кесил 7 йил озодликдан маҳрум қилиш жазоси берилишини сўради.

Ўз навбатида адвокатлар гуруҳи Алишер Турсуновга қўйилган икки модда — «Жамоат хавфсизлиги ва тартибига таҳдид соладиган материалларни тарқатиш» ҳамда «Миллий, ирқий, этник ёки диний адоват қўзғатиш» айбловларини бекор қилишни сўради.

Шу билан бирга, материалларни Дин ишлари бўйича қўмита рухсатисиз тарқатишга оид айблов қисман тан олинди. Ҳимоячилар бу ҳаракат ижтимоий хавфлиликдан маҳрум бўлганини қайд этиб, уни ЖК 70-моддаси асосида бекор қилиш ва мусодара қилинган техника ҳамда ашёларни қайтаришни сўради.

Адвокатлар судда қўйилган 3 модда бўйича айбловчилар ва экспертлар билан келишмовчиликлари ҳамда эътирозларини билдирди. Шунингдек, ҳукм чиқаришда Мубашшир Аҳмаднинг саломатлиги, жамиятдаги ўрни, ёшлар таълимига қўшган ҳиссаси ва оилада ягона боқувчи экани инобатга олиниши сўралди. Мубашшир Аҳмад ҳимоячиларининг фикрига тўлиқ қўшилишини билдирди.

Эслатиб ўтамиз, Мубашшир Аҳмад Жиноят кодексининг 156-моддаси (миллий, ирқий, этник ёки диний адоват қўзғатиш) 2-қисми, 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми «г» банди ва 244-3-моддаси (диний мазмундаги материалларни қонунга хилоф равишда тайёрлаш, сақлаш, олиб кириш ёки тарқатиш)да айбланмоқда.

Навбатдаги суд мажлиси 22 сентябр, соат 14.00 га белгиланди.