Филиппин АҚШнинг ҳарбий ҳудудига айланмоқдами?

Маҳаллий фаоллар ва экспертлар фикрича, АҚШ билан ҳарбий ҳамкорликнинг кучайиши Филиппинни йирик геосиёсий тўқнашувлар марказига айлантириши мумкин.

Жорий йилги машғулотларда 17 минг нафар ҳарбий хизматчи иштирок этди. Улар орасида АҚШ, Япония ва Австралия ҳарбийлари ҳам бор.

Хитой билан зиддият хавфи кучаймоқда

Мутахассислар айтишича, Жанубий Хитой денгизи яқинида АҚШ ҳарбий техникаси ва ракета тизимларининг жойлаштирилиши Пекиннинг кескин норозилигига сабаб бўлмоқда.

Айниқса, АҚШнинг “Typhon” ракета тизимлари минтақадаги вазиятни янада таранглаштириши мумкинлиги таъкидланмоқда. Бу тизимлар “Tomahawk” қанотли ракеталарини учириш имкониятига эга.

Филиппин жамоатчилиги орасида эса эҳтимолий қуролли тўқнашувда мамлакат биринчи нишонга айланиши мумкинлиги ҳақида хавотирлар кучайган.

Балиқчилар даромадсиз қолмоқда

Ҳарбий машғулотлар ва махсус чеклов ҳудудлари жорий қилиниши маҳаллий аҳолига ҳам салбий таъсир кўрсатмоқда.

Хусусан, айрим денгиз ҳудудларида кемалар ҳаракати чеклангани сабаб минглаб балиқчилар ўзининг асосий даромад манбаидан маҳрум бўлаётгани айтилмоқда.

Маҳаллий фаоллар бу ҳолат ижтимоий муаммоларни янада кучайтиришидан хавотир билдирмоқда.

АҚШ базалари фаол қўлланилмоқда

Танқидчиларнинг таъкидлашича, АҚШ Филиппин ҳарбий базаларидан ёнилғи қуйиш, разведка ва логистика мақсадларида фаол фойдаланмоқда.

Уларнинг фикрича, Манила тобора Вашингтоннинг Осиё-Тинч океани минтақасидаги стратегик ҳарбий нуқтасига айланиб бормоқда.

Сиёсатшунослар эса бу жараён Филиппинни ташқи геосиёсий қарама-қаршиликлар гирдобига тортиб кетиши мумкинлигидан огоҳлантирмоқда.