Эквадор жиноятчиликка қарши кескин кураш йўлини танлади

Унинг айтишича, сўнгги даврда ўнлаб жиноят олами етакчилари АҚШга экстрадиция қилинган ва қарийб 300 тонна гиёҳванд моддалар мусодара этилган.

Президент таъкидлашича, мамлакатда хавфсизликни таъминламасдан туриб барқарор ривожланишга эришиб бўлмайди.

 “Оилалар қўрқувда яшар экан, давлат тараққий этмайди”, — деди Нобоа.

Жиноий картелларга қарши курашиш мақсадида ҳарбийларга кенгайтирилган ваколатлар берилган. Энди улар полиция билан биргаликда қўшма патруллик ишларини олиб бормоқда ҳамда айрим ҳолатларда ордерсиз тинтув ўтказиш ҳуқуқига эга.

Президент ўз нутқида иқтисодий кўрсаткичларга ҳам тўхталиб, мамлакатда камбағаллик даражаси 26 фоиздан 21,4 фоизгача, ўта қашшоқлик эса 10,4 фоиздан 8,4 фоизгача пасайганини маълум қилди.

Бироқ ҳуқуқ ҳимоячилари ва мустақил экспертлар бу рақамларга эҳтиёткорлик билан ёндашмоқда. Уларнинг фикрича, ҳукуматнинг “темир мушт” сиёсати ҳозирча зўравонлик даражасини сезиларли камайтирмаган ва мамлакатдаги хавфсизлик билан боғлиқ вазият ҳамон оғирлигича қолмоқда.