Наманган шаҳри Гиннеснинг рекордлар китобига кирди

Наманганда бошланган 65-халқаро гуллар фестивали водийнинг асосий ҳаво дарвозаси – Наманган халқаро аэропорти ҳудудидан гуллар автопаради билан бошланди.

Унда давлатимиз байроғи билан безатилган енгил автомобиллар, юк машиналари, комбайн, трактор, ҳатто автокрангача анвои гулларга бурканган 300 дан зиёд транспорт воситаларидан иборат машиналар карвони Ислом Каримов шоҳ кўчасидан Темир йўл вокзали айланма йўли – Амир Темур – Нодим Намангоний кўчалари бўйлаб ҳаракатланиб, Бобур боғи томон саф бўлиб етиб келди.

Заҳириддин Муҳаммад Бобур номидаги маданият ва истироҳат боғининг ёнгинасидаги катта майдонда бўлиб ўтган расмий очилиш маросимида Қирғиз Республикаси, Тожикистон, Хитой, Жанубий Корея, Россия Федерацияси, Афғонистон, Эрон, Япония каби ўнлаб хорижий давлатларнинг дипломатик корпус вакиллари, чет эл компаниялари инвесторлари,  нуфузли меҳмонлар, маданият ва санъат намояндалари, сайёҳлар ва кенг аҳоли вакиллари иштирок этдилар.

Йиғилганларни юбилей байрами билан қутлаган Наманган вилоят ҳокими, сенатор Шавкат Абдураззоқов фестиваль доирасида 150 дан зиёд халқаро, республика ва маҳаллий миқёсдаги форумлар, маданий-маърифий, оммавий-спорт сингари тадбирлар ўтказилишини таъкидлади.

Ўтган 2025 йилда фестивалга тайёргарлик жараёнида вилоят бўйича жами 100 миллион туп гул кўчати экилган эди.

Бу йил эса ушбу миқдор 150 миллион тупга етказилди. Биргина Заҳириддин Муҳаммад Бобур номидаги маданият ва истироҳат боғида бир ой давомида жамоа томонидан 29 миллион 600 мингдан зиёд гуллар экилди.

Бундай улкан лойиҳа натижасида яна бир тарихий ютуққа эришилиб, Наманган шаҳри “Бир ой ичида жамоа томонидан экилган энг кўп гул” номинацияси бўйича Гиннеснинг рекордлар китобига расман киритилди.

Фестивалнинг очилишида ушбу тарихий муваффақиятни тасдиқловчи махсус сертификатни “Guinness World Records” ташкилоти вакили Шейда Субаси хоним Наманган вилояти ҳокимлиги раҳбариятига тантанавор руҳда топширди.

65-халқаро гуллар фестивали, энг аввало, маҳаллалардан бошлангани билан аввалгиларидан ажралиб туради. Яъни бу йил вилоятдаги мавжуд 754 маҳалланинг барчаси иштирокчига айланди. Улар ўртасида "Энг гулзор, энг обод маҳалла" кўрик-танлови ўтказилмоқда.

Анъана тусига кирган тадбирлар – Чуст туманида “Ош танлови”, Поп туманида “Лаванда сайли” қаторига эндиликда Мингбулоқ туманида “Патир фестивали” ҳам қўшилмоқда. 

Вилоят туризм бошқармасидан маълум қилинишича, 65-халқаро гуллар фестивалига эллик кун давомида 1 миллиондан зиёд хорижий, 7 миллионга яқин маҳаллий сайёҳларнинг ташриф буюриши кутилмоқда.

65-халқаро гуллар фестивали жорий йилнинг 12 июлига қадар давом этади. Байрамда фаол қатнашадиган гулчилар ва ташкилотлар қимматбаҳо совғалар, жумладан, автомобиллар билан мукофотланади.