Ерни аукционсиз расмийлаштиришни ваъда қилган шахс қўлга олинди

Иқтисодий жиноятларга қарши курашиш департаментининг Наманган вилояти бошқармаси ҳуқуқни муҳофаза қилувчи органлар билан ҳамкорликда ўтказган тезкор тадбир давомида Норин-Сирдарё ирригация тизимлари ҳавза бошқармаси ходими Х.Д. ҳамда фуқаро Б.А.нинг ҳаракатларига чек қўйилди.

Терговга оид дастлабки маълумотларга кўра, улар фуқаро М.Е.га Мингбулоқ тумани ҳудудидан 40 сотих ер майдонини аукцион савдоларисиз, унинг номига расмийлаштириб беришни ваъда қилган. Мазкур «хизмат» эвазига талаб қилинган 11,5 минг АҚШ долларини олиш жараёнида ҳар икки шахс ашёвий далиллар билан ушланган.

Жиноят иши қўзғатилди

Қайд этилишича, мазкур ҳолат юзасидан Ўзбекистон Республикаси Жиноят кодексининг 25 ва 168-моддалари (фирибгарликка суиқасд), шунингдек, 28 ва 211-моддалари (пора беришда иштирокчилик) билан жиноят иши қўзғатилган.

Айни пайтда иш бўйича тергов ҳаракатлари давом этмоқда. Ҳодисанинг барча тафсилотларига ҳуқуқий баҳо тергов натижалари асосида берилади.

Муаллиф: Ҳасанбой ОЧУН