24 давлат вакиллари Самарқандда нимани муҳокама қилади?

2026-йил 5–6-ноябр кунлари Самарқанд шаҳрида Хавфсизлик масалалари бўйича ШҲТ плюс биринчи экспертлар мулоқоти ўтказилади. Тадбир Ўзбекистон Республикаси Давлат хавфсизлик хизмати раҳбари, генерал-полковник Б. Қурбонов раислигида ташкил этилади.

Мулоқотнинг асосий мавзуси — «Рақамли трансформация даврида хавфсизлик: янги технологиялар ривожланишини ҳисобга олган ҳолда терроризм ва экстремизмга қарши курашиш».

Мулоқот Ўзбекистон ташаббуси билан йўлга қўйилмоқда

Хавфсизлик масалалари бўйича ШҲТ плюс экспертлар мулоқотини ташкил этиш ташаббуси Ўзбекистон Республикаси Президенти Ш. Мирзиёевга тегишли. Бу таклиф илк бор 2024-йилда ШҲТнинг Остона шаҳрида ўтказилган саммитида илгари сурилган.

2025-йилда Тянцзинда бўлиб ўтган ШҲТга аъзо давлатлар раҳбарлари кенгаши йиғилишида мулоқотнинг биринчи учрашувини Самарқандда ташкил этиш таклиф қилинган эди.

24 давлат ва 5 та халқаро ташкилот вакиллари қатнашади

Бўлажак мулоқотда ШҲТга аъзо давлатлар, кузатувчилар ва мулоқот бўйича ҳамкорлар махсус хизматлари раҳбарлари ҳамда вакиллари иштирок этади.

Шунингдек, халқаро ташкилотлар вакиллари ва таклиф этилган меҳмонлар ҳам тадбирга қатнашиши кутилмоқда. Ташкилотчилар маълумотига кўра, дунёнинг 24 давлатидан 33 та делегация ва 5 та халқаро ташкилот вакиллари Самарқандга келади.

 Терроризм ва экстремизмга қарши курашда янги технологиялар

Мулоқот доирасида илғор технологиялар ва сунъий интеллектнинг замонавий таҳдид ҳамда хавф-хатарларга таъсири муҳокама қилинади.

Учрашув якунида делегациялар раҳбарлари рақамли трансформация даврида халқаро терроризм ва экстремизмга қарши курашиш бўйича ҳамкорликнинг аниқ вазифалари ҳамда устувор йўналишларини белгилаб олиши кўзда тутилган.