Ғузорда пахтага сепилган кимёвий воситадан 22 нафар ўқувчи заҳарланди

Қашқадарё вилояти Ғузор туманида пахта майдонига сепилган кимёвий восита ҳаво орқали тарқалиши оқибатида 51-сонли мактабнинг 22 нафар юқори синф ўқувчиси заҳарланган. Ҳолат юзасидан жиноят иши қўзғатилган. Бу ҳақда ИИВ хабар берди.

Ҳодиса 23 сентябрь куни соат 11:45 атрофида содир бўлган. Ўша куни 10–11-синф ўқувчиларида кўнгил айниши ва бош оғриғи каби аломатлар кузатилиб, улар туман тиббиёт бирлашмасига олиб борилган. Дастлабки тиббий текширувда уларга «ошқозон диспепсия синдроми» ташхиси қўйилган.

Ўрганишлар давомида мактаб жойлашган «Янгиобод» маҳалласига туташ ҳудудда «Шохмалик Шермурод ўғли» фермер хўжалигига тегишли пахта майдонлари борлиги аниқланган. Ушбу майдонларнинг 20 гектари бевосита мактаб атрофида жойлашган.

Дастлабки маълумотларга кўра, 23 сентябрь куни соат тахминан 09:00 да фермер хўжалиги пахтанинг эрта етилишини таъминлаш мақсадида майдонга «Агро Аугрон» номли воситани сепган. Кейин ушбу восита ҳаво орқали тарқалиб, ўқувчиларнинг заҳарланишига сабаб бўлган.

Шифокорлар ёрдамидан сўнг 15 нафар ўқувчининг аҳволи яхшиланган ва улар уйига жавоб берилган. Айни вақтда яна 7 нафар ўқувчи туман тиббиёт бирлашмасида стационар даволанишни давом эттирмоқда.

Ҳолат юзасидан Жиноят кодексининг 201-моддаси 1-қисми билан жиноят иши қўзғатилган. Тегишли экспертизалар тайинланган.

Ҳозирда иш бўйича Қашқадарё вилояти Ички ишлар бошқармаси Тергов бошқармаси томонидан дастлабки тергов ҳаракатлари олиб борилмоқда.