Педофилларга умрбод қамоқ жазоси берилиши мумкин

Ўзбекистон Президенти бешта кодекс ва олтита қонунга ўзгартириш киритишни назарда тутувчи ҳужжатни имзолади. Бу ҳақда Президент Администрацияси раҳбари Саида Мирзиёева ўзининг Telegram-каналида маълум қилди.

Унинг таъкидлашича, ёш болаларга нисбатан зўравонликка асло тоқат қилиб бўлмайди. Бундай жиноятлар учун жазо муқаррар ва муросасиз бўлиши шарт.

«Болага зулм қилган, унга жисмоний ёки руҳий азоб берган ҳар бир кимса — у хоҳ таълим муассасаси ходими бўлсин, хоҳ яқин қариндоши — жавобгарликка тортилади. Боланинг ўлимига сабаб бўлган жиноятлар учун белгиланган жазо асло енгиллаштирилмайди», — деб ёзган Саида Мирзиёева.

Болаларга нисбатан жинсий жиноятлар учун жазо кучайтирилади

Қонунга мувофиқ, 14 ёшга тўлмаган болаларга нисбатан муайян жинсий жиноятларни содир этган шахсларга 25 йилгача озодликдан маҳрум қилиш ёки умрбод қамоқ жазоси тайинланиши мумкин.

Шунингдек, бундай оғир жиноятлар бўйича жиноий жавобгарликка тортиш муддатига чеклов қўйилмайди.

Саида Мирзиёеванинг таъкидлашича, болаларнинг хавфсизлиги ҳеч қандай шароит ёки вазиятга боғлиқ бўлмаслиги керак.

«Ёш боланинг хавфсизлиги шарт-шароит ёки вазиятларга боғлиқ бўлиши мумкин эмас. Болалар ҳаёти, соғлиғи, ор-номусига тажовуз қилган ҳар қандай кимса қатъий жазодан қочиб қутула олмаслигини билиши шарт», — дея қайд этган Президент Администрацияси раҳбари.

Муаллиф: Ҳасанбой ОЧУН