Тошкент автобусларида чиптасиз юриш ҳолатлари 68 фоизга ошди

Бу август ойидаги кунлик ўртача кўрсаткичдан қарийб 68 фоизга юқори.

Транспорт вазирлигининг  маълумотларига кўра, 2026 йил август ойида автобусларда йўл ҳақини тўламаган 10 минг 843 нафар йўловчига нисбатан Маъмурий жавобгарлик тўғрисидаги кодекснинг 144-моддаси 5-қисми — «Транспортда чиптасиз юриш» асосида маъмурий баённомалар расмийлаштирилган.

Август ойида бу кўрсаткич бир кунда ўртача 350 та ҳолатни ташкил этган.

Сентябрь ойининг 1–8 сентябрь кунлари давомида эса 4 696 та ҳолат қайд этилган. Шу тариқа, саккиз кунлик даврда кунлик ўртача кўрсаткич 587 тага етган.

Яъни сентябрнинг дастлабки кунларида бир кунда расмийлаштирилаётган баённомалар сони август ойидаги ўртача кўрсаткичдан 237 тага кўп. Бу қарийб 68 фоизлик ўсишни англатади.

Янги тартибдан кейин назорат кучайтирилди

Бунгача жорий йил 1 сентябрдан бошлаб брутто-шартнома асосида фаолият юритаётган барча шаҳар автобусларида йўлкира тўлашнинг янги тартиби жорий этилиши маълум қилинган эди.

Янги тартибга кўра, йўловчи автобусга чиққанидан сўнг йўл ҳақини тўлаши шарт.

Мазкур талабга риоя этилишини таъминлаш мақсадида автобусларда тўлов маданиятини оширишга қаратилган назорат-рейд тадбирлари кучайтирилган.

Шу нуқтаи назардан қараганда, сентябрь ойида қайд этилган ҳолатларнинг кўпайиши икки хил омил билан боғлиқ бўлиши мумкин. Бир томондан, янги тартибга қарамай, йўл ҳақини тўламасдан ҳаракатланаётганлар сони ортган. Иккинчи томондан эса назорат-рейд тадбирларининг кучайтирилиши қоидабузарликларни аниқлаш кўламини оширган бўлиши мумкин.

Шунинг учун сентябрдаги 68 фоизлик ўсишни фақат йўловчиларнинг қонунбузарликка мойиллиги ортиши билан изоҳлаш тўғри бўлмайди. Рейдлар сони ва назорат қамровининг ошгани ҳам статистикага таъсир қилган бўлиши эҳтимолдан ҳоли эмас.

Муаллиф: Ҳасанбой ОЧУН