Namangan shahri Ginnesning rekordlar kitobiga kirdi

Namanganda boshlangan 65-xalqaro gullar festivali vodiyning asosiy havo darvozasi – Namangan xalqaro aeroporti hududidan gullar avtoparadi bilan boshlandi.

Unda davlatimiz bayrog‘i bilan bezatilgan yengil avtomobillar, yuk mashinalari, kombayn, traktor, hatto avtokrangacha anvoyi gullarga burkangan 300 dan ziyod transport vositalaridan iborat mashinalar karvoni Islom Karimov shoh ko‘chasidan Temir yo‘l vokzali aylanma yo‘li – Amir Temur – Nodim Namangoniy ko‘chalari bo‘ylab harakatlanib, Bobur bog‘i tomon saf bo‘lib yetib keldi.

Zahiriddin Muhammad Bobur nomidagi madaniyat va istirohat bog‘ining yonginasidagi katta maydonda bo‘lib o‘tgan rasmiy ochilish marosimida Qirg‘iz Respublikasi, Tojikiston, Xitoy, Janubiy Koreya, Rossiya Federatsiyasi, Afg‘oniston, Eron, Yaponiya kabi o‘nlab xorijiy davlatlarning diplomatik korpus vakillari, chet el kompaniyalari investorlari,  nufuzli mehmonlar, madaniyat va san’at namoyandalari, sayyohlar va keng aholi vakillari ishtirok etdilar.

Yig‘ilganlarni yubiley bayrami bilan qutlagan Namangan viloyat hokimi, senator Shavkat Abdurazzoqov festival doirasida 150 dan ziyod xalqaro, respublika va mahalliy miqyosdagi forumlar, madaniy-ma’rifiy, ommaviy-sport singari tadbirlar o‘tkazilishini ta’kidladi.

O‘tgan 2025-yilda festivalga tayyorgarlik jarayonida viloyat bo‘yicha jami 100 million tup gul ko‘chati ekilgan edi.

Bu yil esa ushbu miqdor 150 million tupga yetkazildi. Birgina Zahiriddin Muhammad Bobur nomidagi madaniyat va istirohat bog‘ida bir oy davomida jamoa tomonidan 29 million 600 mingdan ziyod gullar ekildi.

Bunday ulkan loyiha natijasida yana bir tarixiy yutuqqa erishilib, Namangan shahri “Bir oy ichida jamoa tomonidan ekilgan eng ko‘p gul” nominatsiyasi bo‘yicha Ginnesning rekordlar kitobiga rasman kiritildi.

Festivalning ochilishida ushbu tarixiy muvaffaqiyatni tasdiqlovchi maxsus sertifikatni “Guinness World Records” tashkiloti vakili Sheyda Subasi xonim Namangan viloyati hokimligi rahbariyatiga tantanavor ruhda topshirdi.

65-xalqaro gullar festivali, eng avvalo, mahallalardan boshlangani bilan avvalgilaridan ajralib turadi. Ya’ni bu yil viloyatdagi mavjud 754 mahallaning barchasi ishtirokchiga aylandi. Ular o‘rtasida "Eng gulzor, eng obod mahalla" ko‘rik-tanlovi o‘tkazilmoqda.

An’ana tusiga kirgan tadbirlar – Chust tumanida “Osh tanlovi”, Pop tumanida “Lavanda sayli” qatoriga endilikda Mingbuloq tumanida “Patir festivali” ham qo‘shilmoqda. 

Viloyat turizm boshqarmasidan ma’lum qilinishicha, 65-xalqaro gullar festivaliga ellik kun davomida 1 milliondan ziyod xorijiy, 7 millionga yaqin mahalliy sayyohlarning tashrif buyurishi kutilmoqda.

65-xalqaro gullar festivali joriy yilning 12-iyuliga qadar davom etadi. Bayramda faol qatnashadigan gulchilar va tashkilotlar qimmatbaho sovg‘alar, jumladan, avtomobillar bilan mukofotlanadi.