Donald Tramp 22-sentabr kuni BMT Bosh Assambleyasi sessiyasida so‘zlar ekan, AQSh Eron bilan kelishuvga erishishiga ishonch bildirdi. Uning aytishicha, bu kelishuv AQShdagi oraliq saylovlardan keyin tuzilishi mumkin.

“Menimcha, biz saylovlardan keyin darhol kelishuvga erishamiz”, — dedi Tramp.

Shuningdek, Tramp Nyu-Yorkda AQSh va Eron vakillari bir necha oy tanaffusdan so‘ng muzokara o‘tkazganini ma’lum qildi. AQSh tomonini Trampning maxsus vakillari Stiv Uitkoff va Jared Kushner, Eron tomonini esa tashqi ishlar vaziri Abbos Araqchi vakillik qilgan. Muzokaralar vositachilar orqali olib borilgan.

Uitkoff keyinchalik ijtimoiy tarmoqdagi sahifasida muzokaralar davomida vositachilar ikki tomon o‘rtasida muloqot olib borganini va navbatdagi muhokamalar o‘tkazilganini bildirdi.

BMT Bosh Assambleyasidagi nutqida Tramp Eron bilan kelishuvga erishish yoki boshqa choralar ko‘rish bo‘yicha muhim qaror qabul qilishi kerakligini aytdi. U AQSh Eronning yadroviy qurolga ega bo‘lishining oldini olganini ta’kidladi.

Trampning aytishicha, AQSh Eron yadroviy dasturini qisqartirishi va terrorizmni qo‘llab-quvvatlashni to‘xtatishi evaziga iqtisodiy hamkorlik taklif qilgan. Uning so‘zlariga ko‘ra, Tehron bu taklifni rad etgan.

Reuters xabariga ko‘ra, Eron tomoni esa diplomatik muzokaralarni qayta boshlash imkoniyatini bildirgan. Tehron AQSh harbiy bosimni kamaytirishi va Eron portlariga nisbatan blokadani bekor qilishi sharti bilan Hormuz bo‘g‘ozini qayta ochishga tayyorligini ham bildirgan.