12 tonna KitKat mahsuloti Yevropada o‘g‘irlandi

Bosh qarorgohi Shveysariyaning Vevey shahrida joylashgan kompaniyaning juma kuni bergan bayonotida “transport vositasi ham, uning yuki ham hali topilmagani” aytilgan.

Shokolad bilan qoplangan vaflidan tayyorlangan qarsildoq batonchalar partiyasi o‘tgan hafta ishlab chiqarish va tarqatish manzillari orasidagi yo‘lda g‘oyib bo‘lgan. Rejaga muvofiq shokolad batonchalari butun Yevropa bo‘ylab tarqatilishi kerak edi.

Kompaniya xabariga ko‘ra, yo‘qolgan shirinliklar Yevropa bozorlaridagi norasmiy savdo tarmoqlariga chiqishi mumkin. Agar bu sodir bo‘lsa, har bir batonlarga biriktirilgan noyob seriya kodi yordamida mahsulotlarni aniqlash imkoni mavjud.

Ya’ni, iste’molchilar va sotuvchilar mahsulot qadog‘idagi seriya raqamlarini skanerlash orqali mahsulot o‘g‘irlangan jo‘natmaning bir qismi ekanligini bilishlari mumkin. Agar raqamlar mos kelsa, skanerda kompaniyani qanday xabardor qilish haqida aniq ko‘rsatmalar paydo bo‘ladi. Shu orqali kompaniya dalillarni tegishli idoralarga ulashadi.

Kompaniya o‘g‘irlik bilan bog‘liq qo‘shimcha ma’lumotlarni oshkor etmadi, tergov esa davom etmoqda.