Qozogʻistonda yoʻqolgan harbiy vertolyot boʻlaklari topildi

Qayd etilishicha, qidiruv ishlarining asosiy obʼekti sifatida aynan ushbu suv ombori olingan. Chunki ayni shu yerda favqulodda vaziyatlar vazirligi xodimlari vertolyotning ilk boʻlaklarini topgan.

Qozogʻiston Mudofaa vazirligi maʼlumotiga koʻra, bu soʻnggi yillarda mamlakatda oʻtkazilayotgan eng yirik qidiruv amaliyotlaridan biri. Unda 400 ga yaqin kishi (Mudofaa vazirligi, Favqulodda vaziyatlar vazirligi, Ichki ishlar vazirligi xodimlari), 70 dan ortiq yerusti texnikasi, 21 ta suv transporti, 10 ta uchuvchisiz uchish apparati, suv osti skanerlari, exolotlar hamda xizmat itlari ishtirok etmoqda.

Sorbulak Mustaqil davlatlar hamdoʻstligidagi (MDH) eng yirik sunʼiy oqova suv toʻplash ombori hisoblanadi. Uning ayrim joylari 22 metr chuqurlikka ega, tubi loy bilan qoplangan, suv almashinuvi deyarli yoʻq, koʻrish imkoniyati esa nol darajada. Shu sababli suvosti guruhlari asosan sezgi bilan ishlamoqda.

«Mutaxassislar suv havzasi va qirgʻoq boʻyidagi, shu jumladan, chuqur va yondashish qiyin boʻlgan joylarni ham tekshirib chiqmoqda. Qidiruv ishlari kecha-yu kunduz, toʻxtovsiz olib borilmoqda. Operatsiyani Qozogʻiston qurolli kuchlari harbiy-havo kuchlari qoʻmondoni, aviatsiya general-mayori Asqar Izbasov shaxsan boshqarib bormoqda. U hodisa joyida boʻlib, barcha ishtirokchi boʻlinmalarga rahbarlik qilmoqda», — deyiladi Mudofaa vazirligi xabarida.

Hodisa joyida yoʻqolgan vertolyot ekipaji aʼzolarining oilalari ham bor. Ularga doimiy ravishda aniq maʼlumotlar taqdim etilmoqda. 28 iyul kuni ular bilan birgalikda qidiruv hududi boʻylab havodan koʻzdan kechirish amalga oshirilgan. Ijtimoiy tarmoqlarda tarqalgan videolarda yaqinlari qidiruvlar toʻxtatilmaganini tasdiqlamoqda.

Mudofaa vazirligi qidiruv-qutqaruv operatsiyasi yakuniy natijalarga erishilmaguncha davom ettirilishini maʼlum qildi.

Eslatib oʻtamiz, joriy yilning 25 iyul kuni Olmaota viloyatidagi “Lugovoye” aerodromidan havoga koʻtarilgan EC-145 rusumdagi harbiy vertolyot radarlardan gʻoyib boʻlgan edi.