Noqonuniy qurilishga aldanib qolmang!

Qurilish vaziri Sherzod Hidoyatov aholini uy yoki kvartira sotib olishdan oldin obʼektning qonuniyligini albatta tekshirishga chaqirdi.

Vazirning soʻzlariga koʻra, Qurilish vazirligi faoliyatidagi barcha 24 ta yoʻnalish toʻliq raqamlashtirilgan va “Shaffof qurilish” markaziga ulangan. Ayni paytda nazorat inspektorlari joylarga chiqqan holda barcha qurilish obʼektlaridagi jarayonlarni foto va video orqali qayd etib bormoqda.

— Aholiga murojaat qilmoqchiman: agar uy-joy sotib olmoqchi boʻlsangiz, obʼekt Qurilish nazorati inspeksiyasida roʻyxatdan oʻtgan yoki oʻtmaganligini tekshiring. Agar roʻyxatdan oʻtgan boʻlsa, bu qurilish ishlari qonun-qoidalar asosida olib borilayotganini anglatadi, — deya taʼkidladi vazir.

Shuningdek, u fuqarolar “Shaffof qurilish” onlayn platformasi orqali qurilish jarayonlarini har kuni yoki haftalik kesimida kuzatib borish imkoniyatiga ega ekanini qayd etdi.

Qaysi sayt orqali tekshirish mumkin?

Qurilish obʼektlarini tekshirish imkoniyati dshk.shaffofqurilish.uz rasmiy veb-sayti orqali yaratilgan.

Ushbu platforma orqali nafaqat koʻp qavatli turar joylar, balki har qanday qurilayotgan bino-inshoot haqida toʻliq maʼlumot olish, shuningdek, obʼektga oid barcha qurilish hujjatlari bilan tanishib chiqish mumkin.

“Shaffof qurilish” tizimi qanday ishlaydi?

Tizimdan foydalanish uchun avvalo dshk.shaffofqurilish.uz saytiga kirib, kerakli viloyatni tanlash lozim. Shundan soʻng hudud xaritasida turli rangdagi nuqtalar paydo boʻladi:

• koʻk rang — qurilishi davom etayotgan obʼektlar;
• qizil rang — qurilishi vaqtincha toʻxtatilgan obʼektlar;
• qora rang — qurilishi bekor qilingan obʼektlar.

Kerakli obʼekt ustiga bosilganda uning nomi, manzili va buyurtmachisi haqidagi maʼlumotlar aks etadi.

“QR-pasportni koʻrish” tugmasi orqali esa obʼektga oid hujjatlar bilan tanishish, binoning qavatlar soni, umumiy maydoni hamda sarflanayotgan mablagʻlar haqida maʼlumot olish mumkin.