Toshkentda OITS tarqatish maqsadida oʻrindiqlarga igna qoʻyib ketishyotgani rostmi?

Poytaxt IIBB tomonidan oʻtkazilgan tezkor surishtiruvlar natijasida ushbu soxta videoni tayyorlagan va tarqatgan shaxslar aniqlangan. Ular OITS bilan bogʻliq boʻlgan xavotir va vahima uygʻotish maqsadida insayderlik koʻrinishidagi sahnalashtirilgan videolarni tayyorlaganliklarini tan olgan.

«Oʻrtogʻim “SPID haqida video olaylik” degandi. Qilgan ishimdan pushaymonman. Butun xalqdan uzr soʻrayman. Bu darajada ommaga chiqib ketishini bilmaganman», — dedi videoni tayyorlagan shaxslardan biri.

Yana bir shaxs esa videoni Instagram’da koʻrganidan soʻng uni “layk” va “koʻrishlar” uchun qayta ishlab tarqatganini maʼlum qildi:
«Oʻrindiqqa shprits qoʻyib ketilgani haqidagi videoni shunchaki koʻrishlar uchun qilgandim. Qilgan ishimdan afsusdaman, xalqdan uzr soʻrayman», — dedi u.

Videoni tayyorlab tarqatgan ikki shaxsga nisbatan Maʼmuriy javobgarlik toʻgʻrisidagi kodeksning 202-2-moddasi («Yolgʻon axborot tarqatish») boʻyicha huquqiy hujjatlar rasmiylashtirildi.

Holat yuzasidangi ish Jinoyat ishlari boʻyicha Mirzo Ulugʻbek tuman sudiga yuborildi.