Beshyogʻoch mashmashasi: "Snos"ga tushgan yerning egasi kim?

Bundan bir necha hafta oldin ijtimoiy tarmoqlarda Toshkent shahar Chilonzor tumani "Beshyogʻoch" mahallasining binosi buzib tashlanib, oʻrniga yangi mehmonxona qurilayotgani haqidagi xabarlar tarqalgan edi. Mazkur holatga rasmiylar eʼtibor qaratmaganidan keyin mahalla faollari tomonidan tuman sudiga murojaat qilindi. 

Avvalroq xabar berganimizdek, ilk sud joriy yilning 19 fevral kuni uch arizachi, Toshkent shahri va Chilonzor tuman hokimligi yuristlari bilan birga bir guruh tinglovchilar ishtirokida boʻlib oʻtgandi. Unda taraflar tinglanib, sud maʼlum muddatga qoldirildi. 

Bugun, 26 fevral kuni esa sudning ikkinchi majlisi boʻlib oʻtdi. Chilonzor tuman sudyasi Sultonov boshchiligidagi sudda toʻrt nafar arizachi, Toshkent shahri, Chilonzor tuman hokimligi yuristlari, tuman prokurori va bir guruh tinglovchilar qatnashdi. 

Aniq toʻxtamga kelish uchun batafsil hujjatlar talab qilingani bois sud 7 mart kuniga qoldirildi. Keyingi sud jarayonida yuqorida sanab oʻtilgan shaxslardan tashqari, Madaniy meros, Kadastr agentligidan mutaxassislar, "Beshyogʻoch" MFY hamda quruvchi tashkilot "One Housing Group"dan rasmiy vakillar ishtirok etishi kutilmoqda. 

Sudga daʼvo kiritgan arizachilardan biri Javlon Mahmudovning aytishicha, bu galgi sud jarayonida fuqarolardan yashirilgan Toshkent shahar hamda Chilonzor tuman hokimlarining qarorlari ochiqlanilgan.

"Bugun shahar hokimi bilan tuman hokimining qarorlarini oʻrganishga ruxsat berishdi, lekin nusxa olishga qoʻyishmadi. Buni noqonuniy deb hisoblaymiz. Nimaga desangiz, bunaqa ishlarda hokimning qarori ham, prezidentning qarori ham ochiq boʻlishi kerak. Bu davlat siri emas. Bu qanaqadir harbiy obʼekt yoki oltin kon emaski, berkitilsa", deydi u.

Mahmudovning qoʻshimcha qilishicha, mazkur qurilish uch tomonlama xususiy sherikchilik asosida rejalashtirilgan boʻlib, unda Chilonzor tuman hokimligi, "Beshyoʻgʻoch" mahallasi hamda "One Housing Group" ishtirok etishi kerak.

"Xususiy sherikchilik toʻgʻrisidagi qonunga koʻra, hamma narsa ochiq maʼlumot hisoblanishi kerak. Ochiq maʼlumotlarda boshqa sheriklar koʻrsatilgan, ammo “One Housing Group” u yerda yoʻq. Buni internetdan skrinshot qilib, sudga taqdim etdik", deya taʼkidlaydi u.

Bundan tashqari, Mahmudov mahalla binosi tushgan yer maydoni aslida kimga qarashliligi nomaʼlumligicha qolayotganini bildirdi. Shuning uchun ham sud keyingi yigʻinda Kadastr agentligidan mutaxassis jalb qilmoqda.

"Bu mulkda kadastr yoʻq. Bu bino uch yil oldin qurilgan, lekin oqsoqolimizning aytishicha, hokimiyat har xil yoʻllar bilan kadastr olishiga xalaqit qilib kelgan. Bu yerda hokim xohlagan odamning binosini boshqa shaxsga berib yuborayotganga oʻxshaydi. Bu binoning birinchi egasini topish kerak-da, agar qonuniy boʻlsa, bunga kadastr berish shart", deydi daʼvogar.