Toshkentda kesilgan 145 tup daraxt boʻyicha hokimlik izoh berdi

Toshkent shaharida Bobur koʻchasida 145 tup archaning kesilishi jamoatchilik va ekologlar tanqidiga sabab boʻldi. Prezident farmoni bilan joriy etilgan daraxt kesish moratoriysiga zid holat yuzasidan tekshiruv boshlandi.

Toshkent shahar hokimligi rasmiy bayonot berib, koʻcha boʻylab 83 tup piramidasimon gʻujum va 62 mingdan ortiq manzarali butalar ekilishi rejalashtirilganini bildirdi. Bayonotda taʼkidlanishicha, archalarning koʻpchiligi kasallangan va qurub borayotgan boʻlgan va daraxtlarni ehtiyotkorlik bilan koʻchirish rejalashtirilgan, ammo ayrim masʼullar jarayonda talablarga toʻliq amal qilmagan.

Ekologiya vazirligi kesilgan daraxtlar oqibatida hisob-kitoblarga koʻra 620 million soʻmdan ortiq ekologik zarar yetkazilganini maʼlum qildi. Hujjatlar rasmiylashtirilib aybdorlarni javobgarlikka tortish uchun prokuraturaga yuborilgan va xizmat tekshiruvi olib borilmoqda.

Sobiq deputat, Ekologiya vaziri maslahatchisi Rasul Kusherboyev Yakkasaroy tumanida 144 tup archa moratoriyga zid ravishda kesilganini maʼlum qildi. Guvohlar aytishicha, ishlar hokim oʻrinbosari Baxtiyor Rahmonov topshirigʻi bilan tungi paytda amalga oshirilgan.

«Ezgulik» jamiyati rahbari, huquq faoli Abduraxmon Tashanov ham ushbu voqeaga eʼtiroz bildirib, bunday ishlar jamoatchilikdan yashirin tarzda emas, ochiq va shaffof amalga oshirilishi lozimligini taʼkidlagan.