Yana bir oʻzbekistonlik yigit Rossiyadagi urushga borib, Ukrainada asirga tushdi

Yigitning soʻzlariga koʻra, u Rossiya armiyasi safida qatnashish shartnomasini majburiy ravishda imzolagan. Federatsiya politsiyasi uni giyohvand moddalar bilan aloqadorlikda ayblab, 12-18 yilgacha qamab yuborish bilan qoʻrqitgan. Uning oldida esa ikkita yoʻl — yo qamoq, yoki front.

Buxorlik yigit frontga yetib kelishi bilan Ukrainaning harbiy dronlari uni aniqlagan. U darhol qurolsiz holatda taslim boʻlgan. Rossiya armiyasidagi sharoitlar haqida gapirar ekan, u aloqa vositalari va harbiy jihozlarni oʻz hisobidan sotib olgani, armiyada tartibsizlik va aldov hukmronligini bildirgan.

Avvalroq Uzdiplomat.uz nashri bilan gaplashgan frontdagi oʻzbekistonlik askar u yerda oʻzbekistonlik askarlar koʻpligini aytgan.

Uning soʻzlariga koʻra, ular mamlakatga qaytish uchun Oʻzbekistonning Rossiya Federatsiyasidagi elchixonasiga murojaat qilgan biroq ulardan hech qanday javob boʻlmagan.