Алимент қарздорларини оммавий эълон қилиш амалиёти инсон ҳуқуқларига зид — Омбудсман

Ижтимоий тармоқларда Жиззах вилоятида алимент бўйича қарздор шахслар рўйхатлари маҳалла Telegram гуруҳларига тарқатилаётгани, шунингдек уларнинг фотосуратлари маҳалла бинолари ва масжид ҳудудларига илиб қўйилаётгани ҳақидаги хабарлар кенг муҳокамага сабаб бўлмоқда.

Таъкидлаш жоизки, Ўзбекистон Республикаси Конституциясининг 26-моддасига мувофиқ, инсоннинг шаъни ва қадр-қиммати дахлсиздир ва ҳеч нарса уни камситиш учун асос бўла олмайди.

Шунингдек, Жиноят кодексининг 7-моддасига кўра, жазо ва бошқа ҳуқуқий таъсир чоралари жисмоний азоб бериш ёки инсон қадр-қимматини камситиш мақсадини кўзламайди.

Алимент тўлаш — ота-онанинг қонуний мажбурияти ва боланинг дахлсиз ҳуқуқидир. Боланинг таъминот олиш ҳуқуқи давлат ҳимоясида бўлиб, уни таъминлаш бўйича чоралар қонун доирасида қатъий амалга оширилиши лозим.

Бироқ қарздорларни оммавий равишда шарманда қилиш, шахсий маълумотларини тарқатиш ёки фотосуратларини жамоат жойларига илиб қўйиш каби амалиётлар ҳуқуқий давлат тамойилларига зид бўлиб, инсон қадр-қимматини камситишга олиб келади.

Инсон қадри — ҳар қандай ижро ҳаракатларидан устундир.