Нега АҚШ 30 йилдан кейин Раул Кастро ишини қайта очди?

Ўшанда содир бўлган ҳалокат оқибатида тўрт нафар АҚШ фуқароси ҳалок бўлган эди.

Айбловларга кўра, Раул Кастро АҚШ фуқароларини ўлдириш мақсадида тил бириктириш, тўртта қотиллик эпизоди ва ҳаво кемасини йўқ қилишда айбланмоқда. Ҳодиса юз берган вақтда у Куба мудофаа вазири лавозимида фаолият юритган.

Вашингтоннинг бу қарори ортида фақат ҳуқуқий эмас, балки йирик геосиёсий манфаатлар ҳам мавжуд. Чунки қарийб 30 йил давомида очилмаган иш айнан ҳозир қайта кун тартибига чиқарилди.

Таҳлилчилар бу қадамнинг бир нечта асосий мақсадини кўрсатмоқда. Биринчи навбатда, АҚШ Кубага нисбатан эҳтимолий кескин чоралар учун ҳуқуқий асос яратишга уринмоқда. Бу ҳолат айрим экспертлар томонидан Венесуэла президенти Николас Мадурога қарши амалга оширилган босим сиёсати билан қиёсланмоқда.

Иккинчи омил — Ғарбий ярим шарда Россия ва Хитой таъсирини чеклаш. Куба Москва ва Пекин учун стратегик ҳамкор сифатида қаралаётгани сабабли, Вашингтон Гаванага босимни кучайтириш орқали рақибларининг минтақадаги таъсирини камайтиришни мақсад қилгани айтилмоқда.

Шунингдек, таҳлилчилар АҚШ янги санкциялар ва иқтисодий босим учун ҳам ҳуқуқий асос тайёрлаётганини таъкидламоқда. Бу орқали Кубанинг энергетик ва иқтисодий имкониятларини чеклаш режалаштирилгани қайд этилмоқда.

Ички сиёсий омил ҳам муҳим ҳисобланмоқда. Хусусан, Флоридада яшовчи кубалик муҳожирлар орасида қатъий позиция намойиш этиш АҚШдаги сайловолди жараёнлари нуқтаи назаридан муҳим аҳамият касб этиши мумкин.

Ҳозирда 94 ёшда бўлган Раул Кастро расмий лавозимлардан кетган бўлса-да, Куба сиёсий тизимида таъсирли фигура сифатида қолмоқда. Гавана ҳукумати эса ушбу айбловлар юзасидан ҳозирча расмий муносабат билдирмаган.

Экспертлар фикрича, Вашингтоннинг бу ҳаракати “кечиккан адолат”дан кўра, Кубага нисбатан янги босим стратегиясидек кўринмоқда.

Муаллиф: Азиз Солиев