Россиялик депутат "Сибир ўзбеклар тарихий ватани" деган гаплари учун кескин танқидга учради

КПРФ Марказий Қўмитаси раис ўринбосари Юрий Афониннинг URA.RU ахборот агентлигига билдиришича, Таги-Заде партия сафларидан аллақачон ҳайдалган ва партиянинг ҳозирги сиёсий йўналишига ҳеч қандай алоқаси йўқ.

"У партия интизоми ва этикаси бузилгани учун бир неча йил олдин КПРФдан чиқарилган. Биз энди уни ҳеч қачон номзод сифатида кўрсатмаймиз. Унинг бу фикрлари партиянинг позициясига мос келмайди ва бу шахсий нуқтаи назар", — деди Юрий Афонин журналистлар билан суҳбатда.

Шунингдек, Давлат Думаси депутати, КПРФ аъзоси Михаил Матвеев ҳам Таги-Заде баёнотига кескин муносабат билдирди:

"Бу провокатор КПРФдан чиқарилган ва партиямизга алоқаси йўқ. Унинг бемаъни гаплари партиямиз позициясини ифодаламайди. У бундай гапларни шунчаки айтган эмас – бу аслида Россияга қарши ҳужум. Бу маҳаллий аҳолининг туғилиш даражаси ва ўлим кўрсаткичи муҳокама қилинаётган пайтда айтилган. Яъни у мигрантлар орқали туб аҳолининг ўрнини босиш ғоясини илгари сурмоқда. Ўзбекларнинг ушбу ҳудудда ътарихий ҳуқуқлариъ бор деган иддаоси эса, кўп ҳолларда махсус тайёрланган методикага ўхшайди. ФСБ бунга эътибор қаратиши лозим – бу яширин сепаратизм белгисидир", — деб ёзди Матвеев ўзининг Телеграм-каналида.

Аввалроқ, Челябинск вилоятидан Давлат Думаси депутати Станислав Наумов ҳам Таги-Задени танқид қилган эди. У депутатнинг "ўзбек мигрантлари ХМАОга тарихий ватани сифатида қайтиши мумкин" деган сўзларини парламентдан четлатиш учун асос бўлиши керак, деб ҳисоблайди.

Эслатиб ўтамиз, Таги-Заде ушбу фикрларини ХМАО Думаси йиғилишида баён этган. У ўз чиқишида Сибир хони Қучум ва Шайбонийлар сулоласига мурожаат қилиб, ХМАО ҳудудини ўзбекларнинг тарихий юрти деб атаган. Бу эса ҳамкасблари ва жамоатчилик орасида кескин норозиликка сабаб бўлди.