Россия 200 нафар тожикистонлик маҳкумани ватанига қайтаради

Россиянинг инсон ҳуқуқлари бўйича вакили Татяна Москалкова мамлакат қамоқхоналарида жазо муддатини ўтаётган 200 нафарга яқин тожикистонлик аёлни ўз ватанига қайтариш бўйича Эмомали Раҳмондан ижобий жавоб олганини маълум қилди.

Москалкова Тожикистон президентига мактуб йўллаб, инсонпарварлик нуқтаи назаридан аёлларга жазони ўз юртида ўташ учун рухсат беришини сўраган.

Унинг таъкидлашича, аксарият ҳолларда жиноят содир этилгани тасдиқланса-да, жазо ҳар доим ҳам энг оғир даражада бўлиши шарт эмас.

“Баъзан кечиримли бўлиш инсоннинг тузалишига, пушаймон бўлишига ва яхши томонга ўзгаришига ёрдам беради. Шу боис биз аёллар учун енгиллик берувчи асосларни ҳар бир ишда топишга ҳаракат қиламиз”, – деди у.

Хорижлик маҳбус аёлларнинг оила аъзолари билан учрашиш имконияти чеклангани, қариндошларидан жўнатмалар қабул қилишда муаммолар мавжудлиги сабабли Москалкова Тожикистон расмийларига мурожаат қилган.

У Россия жазони ижро этиш тизимидаги ислоҳотлар доирасида ҳибс шароитлари яхшиланаётганини, хусусан. зўравонликсиз жиноят содир этган ёш болали аёлларга нисбатан судгача қамоққа олиш чорасини чекловчи қонунни алоҳида таъкидлади.

Шунингдек, Москалкова 14 ёшга тўлмаган фарзанди бор аёллар учун жазо муддатини кечиктириш амалиёти жорий этилганини эътироф этди.

Шу ой бошида Москалкова Россия ўз ҳудудида судланган 3 мингдан ортиқ Ўзбекистон фуқаросини жазони ўташ учун ватанига топширишга тайёрлигини маълум қилган эди.

Бироқ ҳуқуқий тўсиқлар, жумладан, Ўзбекистоннинг 1998-йилги “Маҳкумларни топшириш тўғрисида”ги конвенцияни ратификация қилмагани сабабли бу жараён тўхтаб қолмоқда, деб хабар берди The Times of Central Asia нашри.