Қозоғистонда ҳарорат глобал ўртачадан икки баравар тез ошмоқда

Қозоғистонда сўнгги 50 йил давомида ҳаво ҳарорати глобал ўртача кўрсаткичга нисбатан қарийб икки баравар тез ошган. Бу ҳақда «Қазгидромет» маълумотларига таяниб, CentralAsia хабар берди.

1976–2025 йилларда мамлакатда ўртача йиллик ҳаво ҳарорати ҳар ўн йилда 0,4 даражага ошган. Дунё бўйича эса бу кўрсаткич 0,18–0,20 даражани ташкил этган.

Мутахассисларга кўра, Қозоғистоннинг Евроосиё марказида, океанлардан узоқда жойлашгани ҳароратнинг глобал ўртачадан тезроқ ошишига сабаб бўлувчи омиллардан бири ҳисобланади. Океанлар ҳароратдаги кескин ўзгаришларни юмшатади.

Мамлакат ҳудудларида ҳам ўзгаришлар бир хил эмас. Масалан, Қарағанда вилоятида ўртача йиллик ҳарорат ҳар ўн йилда 0,29 даражага, Ғарбий Қозоғистон вилоятида эса 0,59 даражага ошган.

Энг катта ўсиш баҳор фаслида кузатилган — ҳар ўн йилда ўртача 0,7 даража. Ғарбий ва жанубий ҳудудларда иссиқ кунлар сони ҳам кўпаймоқда.

1941 йилдан буён олиб борилаётган кузатувларга кўра, Қозоғистонда энг иссиқ йил 2025 йил бўлган. Ўша йили ўртача йиллик ҳарорат 1961–1990 йиллар меъёридан 2,96 даражага юқори қайд этилган.