Ноқонуний қурилишга алданиб қолманг!

Қурилиш вазири Шерзод Ҳидоятов аҳолини уй ёки квартира сотиб олишдан олдин объектнинг қонунийлигини албатта текширишга чақирди.

Вазирнинг сўзларига кўра, Қурилиш вазирлиги фаолиятидаги барча 24 та йўналиш тўлиқ рақамлаштирилган ва “Шаффоф қурилиш” марказига уланган. Айни пайтда назорат инспекторлари жойларга чиққан ҳолда барча қурилиш объектларидаги жараёнларни фото ва видео орқали қайд этиб бормоқда.

— Аҳолига мурожаат қилмоқчиман: агар уй-жой сотиб олмоқчи бўлсангиз, объект Қурилиш назорати инспекциясида рўйхатдан ўтган ёки ўтмаганлигини текширинг. Агар рўйхатдан ўтган бўлса, бу қурилиш ишлари қонун-қоидалар асосида олиб борилаётганини англатади, — дея таъкидлади вазир.

Шунингдек, у фуқаролар “Шаффоф қурилиш” онлайн платформаси орқали қурилиш жараёнларини ҳар куни ёки ҳафталик кесимида кузатиб бориш имкониятига эга эканини қайд этди.

Қайси сайт орқали текшириш мумкин?

Қурилиш объектларини текшириш имконияти dshk.shaffofqurilish.uz расмий веб-сайти орқали яратилган.

Ушбу платформа орқали нафақат кўп қаватли турар жойлар, балки ҳар қандай қурилаётган бино-иншоот ҳақида тўлиқ маълумот олиш, шунингдек, объектга оид барча қурилиш ҳужжатлари билан танишиб чиқиш мумкин.

“Шаффоф қурилиш” тизими қандай ишлайди?

Тизимдан фойдаланиш учун аввало dshk.shaffofqurilish.uz сайтига кириб, керакли вилоятни танлаш лозим. Шундан сўнг ҳудуд харитасида турли рангдаги нуқталар пайдо бўлади:

• кўк ранг — қурилиши давом этаётган объектлар;
• қизил ранг — қурилиши вақтинча тўхтатилган объектлар;
• қора ранг — қурилиши бекор қилинган объектлар.

Керакли объект устига босилганда унинг номи, манзили ва буюртмачиси ҳақидаги маълумотлар акс этади.

“QR-паспортни кўриш” тугмаси орқали эса объектга оид ҳужжатлар билан танишиш, бинoнинг қаватлар сони, умумий майдони ҳамда сарфланаётган маблағлар ҳақида маълумот олиш мумкин.