Қурилиш объектларида камералар ўрнатилиши мумкин

Шавкат Мирзиёев қурилиш соҳасида назорат самарадорлигини оширишга қаратилган тақдимот билан танишди. Унда қурилиш объектларини онлайн кузатиш ва ноқонуний қурилишларнинг олдини олиш масалалари муҳокама қилинди.

Қайд этилишича, ҳозирги вақтда қурилиш объектларига видеокузатув камераларини мажбурий ўрнатиш талаби мавжуд эмас. Шу боис биринчи босқичда қиймати 3 миллиард сўмдан юқори бўлган янги ижтимоий объектлар, кўп қаватли уйлар, йирик савдо ва саноат объектлари ҳамда меҳмонхона ва туризм мажмуаларига камералар ўрнатиш таклиф этилмоқда.

Видеокузатув тизими:

• қурилишда ишчиларнинг аниқ ҳисобини юритиш,
• лойиҳа ҳужжатларига риоя этилишини назорат қилиш,
• “конверт” усулида иш ҳақи тўлаш ҳолатларини камайтириш,
• яширин иқтисодиётни қисқартириш,
• меҳнат хавфсизлигини кучайтиришга хизмат қилади.

Шунингдек, тақдимотда ноқонуний қурилишлар масаласига ҳам алоҳида эътибор қаратилди. 1 апрель ҳолатига кўра, республика бўйича 3 791 та ноқонуний қурилиш объекти аниқланган. Уларнинг 1 933 таси саноат зоналари ҳудудига тўғри келади.

Айрим ҳолатларда ерга бўлган ҳуқуқ, қурилиш рухсатномаси, шаҳарсозлик кенгаши ёки экспертиза хулосалари мавжуд эмаслиги қайд этилган.

Бундай қоидабузарликларнинг олдини олиш мақсадида “Онлайн маҳалла” ва Шаффоф қурилиш тизимларини интеграция қилиш, ер ажратилган пайтдан бошлаб электрон огоҳлантириш юбориш ҳамда рухсатномасиз қурилиш учун жавобгарликни кучайтириш таклиф қилинди.