Анора Содиқова ва Мирсаид Хайдаров ўртасидаги баҳс давом этмоқда

Унинг таъкидлашича, суд қарорларига мувофиқ, Мирсаид Хайдаров журналистлар ва уни ҳақорат қилган деб топилган постларни ўчириши ҳамда очиқ Facebook саҳифасида узр сўраши лозим бўлган. Бироқ мазкур талаблар бажарилмагани айтилган.

Шу билан бирга, Анора Содиқова Мирсаид Хайдаровнинг Тошкент вилояти ҳокимлигида бўлим бошлиғи сифатида фаолият юритгани ҳақида расмий манбалар мавжудлигини билдириб, суд жараёнида ишлатилган айрим сўзлар ҳақоратли экани экспертиза орқали аниқланганини қайд этди.

Ушбу баёнотларга жавобан Мирсаид Хайдаров ижтимоий тармоқларда бир қатор изоҳлар қолдирди. У ўзини Тошкент вилояти ҳокимлигида бўлим бошлиғи сифатида кўрсатиш нотўғри эканини таъкидлаб, бу маълумотни ёлғон дея баҳолади. Шунингдек, у экспертиза хулосасида аниқ адресат кўрсатилмагани қайд этилганини билдириб, жамоатчиликни чалғитмасликка чақирди.

Анора Содиқова эса бунга жавобан, Мирсаид Хайдаров мазкур маълумотларни шахсан ўзи суд жараёнида айтганини таъкидлади. Баҳс давомида Хайдаров журналистларни фактларни текширмасликда айблаб, профессионал журналистика талабларига риоя этилмаётганини билдирди.

Мазкур муҳокамага ижтимоий тармоқ фойдаланувчилари ҳам қўшилди. Хусусан, Тошкент вилояти ҳокимлиги расмий сайтида Мирсаид Хайдаров ҳақида тегишли маълумотлар жойлаштирилганини билдириб, «агар ҳокимиятга алоқангиз йўқ бўлса, бу ҳақда расмийларга ҳам айтинг», дея изоҳ қолдирди.

Айни пайтда суд ажрими ижроси қай даражада таъминланаётгани ва Мирсаид Хайдаровнинг расмий лавозими юзасидан масъул идоралар томонидан расмий изоҳ берилмаган.