Бош прокуратура ОАВ вакилларини огоҳлантирди

Маълум қилинишича, сўнгги вақтларда прокуратура томонидан тергов қилинаётган жиноят иши юзасидан ижтимоий тармоқлар орқали тасдиқланмаган ва асоссиз, шунингдек, ишончли расмий манбаларга таянилмаган хабарлар кенг тарқалган.

"Мисол тариқасида Комил Алламжоновга уюштирилган суиқасд юзасидан тегишли идораларнинг малакали ходимларидан иборат тезкор-тергов гуруҳи тузилиб, тергов ҳаракатлари давом этмоқда. Бироқ тафсилотлар ҳақида қўшимча равишда маълумот берилмади. Аммо тармоқларда дезинформациялар тарқалган", дейилади хабарида.

Шунингдек, Бош прокуратура ҳақиқат бўлмаган хабарларни тарқатаётган ижтимоий тармоқ фаолларига мазкур ҳолат юзасидан қонунчиликда жавобгарлик белгиланганини эслатган.

"Қонунчиликда ахборот соҳасидаги ҳуқуқ ҳамда масъулият аниқ белгиланган. Буни, айниқса, фаол ва катта аудиторияга эга блогерлар, ижтимоий тармоқлардаги гуруҳ ва каналлар маъмурлари яхши ҳис этишлари лозим. Чунки жамиятда улар тарқатаётган ҳар қандай ахборотни ҳақиқат сифатида қабул қиладиганлар кўп", дейилади манбада.

Шунингдек, прокуратура медиа вакиллари ҳам худди давлат органларидан талаб этилгани каби соҳага оид амалдаги қонунчилик меъёрларига риоя этишлари шарт эканлигини унутмаслигини билдирган.

"Жамоатчилик орасида турли нотўғри талқин ва тахминлар тарқалишининг олдини олиш мақсадида, оммавий ахборот воситаларидан прокуратура органлари ходимлари ўтказган тезкор ёки тергов тадбирларини ёритишда фақат Бош прокуратура матбуот хизмати томонидан тақдим этилган расмий маълумотларга таянишини ва ҳавола келтиришни қатъий сўраб қоламиз", дейилади прокуратура хабарда.

Бундан ташқари, юқоридаги ҳолат такрорланса, яъни аҳоли орасида ёлғон, ҳақиқатга тўғри келмайдиган ва ваҳима чиқаришга қаратилган материалларни ҳар қандай шаклда тарқатиш учун жиноий жавобгарлик мавжудлиги таъкидлаган.