Чилонзор туманида жойлашган кўчада энди фақат бир томонлама ҳаракатланиш мумкин

Тошкентда Чилонзор туманида жойлашган Ал-Хоразмий кўчасининг бир қисми бир томонлама ҳаракатли қилиб ўзгартирилди. Шу билан бирга, йўл белгилари ва назорат камералари ўрнатилди. Бу камералар туну кун қоидабузарликларни қайд этиб боради.

Гарчи вақтинчалик тўсиқ қўйилган бўлса-да, айрим ҳайдовчилар уни айланиб ўтиб, қарши йўналишда ҳаракатланишда давом этмоқда. Бу эса уларга жарима солинишига олиб келиши мумкин.

Эътиборли томони шундаки, бу ўзгаришлар олдиндан огоҳлантирилмасдан амалга оширилгани аҳоли ва ҳайдовчилар ўртасида норозиликка сабаб бўлмоқда.

Шунингдек, ушбу кўчада 69 ва 118-автобуслар, ҳамда 13-маршрутка ҳаракатини давом эттирмоқда, бу эса йўлдаги янги тартиб билан боғлиқ тушунмовчилик ортишига сабаб бўлмоқда.

Ҳурматли ҳайдовчилар, йўл ҳаракатидаги бундай ўзгаришларга эътиборли бўлишингизни, ўзгаришлар расман эълон қилинмаса-да, жарималар қўлланилиши мумкинлигини эсда тутишни маслаҳат берамиз.