Chilonzor tumanida joylashgan koʻchada endi faqat bir tomonlama harakatlanish mumkin

Toshkentda Chilonzor tumanida joylashgan Al-Xorazmiy koʻchasining bir qismi bir tomonlama harakatli qilib oʻzgartirildi. Shu bilan birga, yoʻl belgilari va nazorat kameralari oʻrnatildi. Bu kameralar tunu kun qoidabuzarliklarni qayd etib boradi.

Garchi vaqtinchalik toʻsiq qoʻyilgan boʻlsa-da, ayrim haydovchilar uni aylanib oʻtib, qarshi yoʻnalishda harakatlanishda davom etmoqda. Bu esa ularga jarima solinishiga olib kelishi mumkin.

Eʼtiborli tomoni shundaki, bu oʻzgarishlar oldindan ogohlantirilmasdan amalga oshirilgani aholi va haydovchilar oʻrtasida norozilikka sabab boʻlmoqda.

Shuningdek, ushbu koʻchada 69 va 118-avtobuslar, hamda 13-marshrutka harakatini davom ettirmoqda, bu esa yoʻldagi yangi tartib bilan bogʻliq tushunmovchilik ortishiga sabab boʻlmoqda.

Hurmatli haydovchilar, yoʻl harakatidagi bunday oʻzgarishlarga eʼtiborli boʻlishingizni, oʻzgarishlar rasman eʼlon qilinmasa-da, jarimalar qoʻllanilishi mumkinligini esda tutishni maslahat beramiz.