Энди танк, самолёт ва аскарлар сонига таяниб ғалабага эришиб бўлмайди — Президент

13 январь куни Ўзбекистон президенти, Қуролли кучлар Олий бош қўмондони Шавкат Мирзиёев раислигида Хавфсизлик кенгашининг кенгайтирилган йиғилиши ўтказилди. Йиғилишда мамлакат ҳарбий хавфсизлиги, мудофаа қобилиятини янада кучайтириш ва замонавий таҳдидларга тайёргарлик масалалари муҳокама қилинди.

Тадбирда Хавфсизлик кенгаши аъзолари, Вазирлар Маҳкамаси, куч тузилмалари раҳбарлари, ҳарбий округлар қўмондонлари ҳамда тегишли идора ва жамоат ташкилотлари вакиллари иштирок этди.

Президент сўнгги йилларда миллий армияни ривожлантириш, уни замонавий қурол-яроғ ва техника билан таъминлаш, ҳарбий хизматчиларнинг жанговар ҳамда маънавий тайёргарлигини ошириш борасида салмоқли ишлар амалга оширилганини таъкидлади. 

Хусусан, армияни рақамлаштириш, учувчисиз аппаратлар бўлинмаларини ташкил этиш, ҳарбий таълим тизимини янгилаш ва сунъий интеллектга асосланган ўқитиш технологияларини жорий этиш натижасида самарадорлик сезиларли ошгани қайд этилди.

Йиғилишда халқаро ва минтақавий вазият таҳлил қилиниб, замонавий уруш шакллари тубдан ўзгаргани таъкидланди.

«Энди фақат танк, самолёт ёки аскарлар сонига таяниш билан ғалабага эришиб бўлмайди. Бугунги жанглар сунъий интеллект, рақамли бошқарув, кибер ва робот технологиялари, юқори аниқликдаги зарбалар ҳамда сиёсий-иқтисодий босим орқали олиб борилмоқда», — деди Президент.

Шу муносабат билан барча соҳалар хавф-хатарларга олдиндан жавоб беришга қаратилган «проактив иш режими»га ўтиши зарурлиги таъкидланди.

Президент ҳарбий кадрлар тайёрлаш тизимини янада такомиллаштиришга алоҳида эътибор қаратди. Муддатли ҳарбий хизматни ёшлар учун нафақат ҳарбий, балки касбий ва ижтимоий тайёргарлик босқичига айлантириш режалаштирилмоқда. Армияда хизмат қилаётган ёшларни касбга ўқитиш, IT ва сунъий интеллект дастурлари бўйича тайёрлаш, олий таълимга кириш учун имкониятлар яратиш белгиланди.

Шунингдек, ҳарбий хизматчилар ва уларнинг оила аъзоларини ижтимоий ҳимоя қилиш чоралари эълон қилинди. 1 апрелдан бошлаб офицерлар учун кўп йиллик хизмат устамалари икки баробар оширилади, контракт асосида хизмат қилаётган аскар ва сержантлар маоши 10 фоизга кўтарилади. Узоқ йил хизмат қилган ҳарбийлар учун пенсия ҳисоблаш тартиби ҳам яхшиланади.

Йиғилишда саккиз йил олдин қабул қилинган Мудофаа доктринаси ва 1997 йилдаги Миллий хавфсизлик концепциясини замонавий таҳдидлардан келиб чиққан ҳолда қайта кўриб чиқиш зарурлиги қайд этилди. Янги доктрина Ўзбекистоннинг ҳарбий блокларга қўшилмаслик сиёсати, технологик янгиланиш ва минтақавий барқарорликни таъминлашга хизмат қилиши лозимлиги таъкидланди.

Йиғилиш якунида Президент барча ҳарбий хизматчиларни Қуролли Кучлар ташкил этилганининг 34 йиллиги ва Ватан ҳимоячилари куни билан табриклади.