Иссиқ сув ҳисоблагичини “орқага қайтариш” таклифи: тизимли муаммо борми?

2026 йил 18 февраль куни Тошкент шаҳри туманларидан биридаги офисда иситиш ва иссиқ сув ҳисоблагичи кўрсаткичларини янгилаш жараёнида ноодатий ҳолат юз берган. Мижоз кўрсаткичларни суратга олиб, операторга тақдим этган ва квитанция расмийлаштирилган.

Шундан сўнг офис ходимларидан бири мижозга “ёрдам” таклиф қилган. Унинг айтишича, тўлов суммасини ярмигача камайтириш мумкин, бунинг учун эса “уйга ходимлар бориб, ҳисоблагични орқага айлантириб беради”. Эвазига квитанциядаги сумманинг ярмини тўлаш таклиф этилган. Мижоз бу таклифни рад этган.

Компания билан расмий муносабат олиш мақсадида колл-марказга мурожаат қилинди. Колл-марказнинг 8-оператори матбуот хизмати алоқаларини тақдим этмади, электрон почта манзили ҳам берилмади. 17-оператор эса компанияга мурожаат учун расмий электрон почта манзили ҳозирча сайтда жойлаштирилмаганини маълум қилди. Унинг айтишича, бу маълумотни сайтга қўшиш таклифи раҳбариятга етказилади.

Шунингдек, оператор ҳисоблагич кўрсаткичларини телефон орқали ҳам тақдим этиш мумкинлигини билдирди. Бироқ бу тартиб расмий манбаларда аниқ ва очиқ шаклда кўрсатилмаган.

Paradigma мухбири билан суҳбатда оператор компания тизимига кириш ҳозирча фақат офисга бориб, оператор орқали парол олиш йўли билан амалга оширилишини ҳам тасдиқлади.

Айни пайтда компания онлайн тизим орқали хизмат кўрсатилаётганини билдирган бўлса-да, амалда мустақил рўйхатдан ўтиш имкони чекланган. Мижоз аввал офисга бориб, оператор орқали парол олиши керак, шундан кейингина Telegram-бот ёки шахсий кабинетдан фойдаланиш мумкин.

Бу тартибни Paradigma.uz журналисти билан телефон орқали суҳбатда компания колл-маркази оператори ҳам тасдиқлади. Унинг айтишича, ҳозирча тизимга кириш фақат офис орқали парол олиш йўли билан амалга оширилмоқда.

Масала юзасидан мутасаддилардан расмий муносабат кутилмоқда.