Тошкентда янги тиббиёт кластерига 150 миллион доллар сарфланади

Лойиҳанинг муҳим қисми — катталар учун кўп тармоқли замонавий тиббиёт маркази қурилиши бўйича шартнома Соғлиқни сақлаш вазирлиги ва “Kyeryong” консорциуми ўртасида имзоланди ҳамда қурилиш ишларига расман старт берилди.

Лойиҳанинг умумий қиймати 149,8 миллион АҚШ доллари бўлиб, шундан 124 миллион доллари Корея Эксимбанки орқали EDCF кредит маблағлари, 25,8 миллион доллари эса Ўзбекистоннинг улуши ҳисобланади.

Қуввати 300 ўринли бўлган IV даражали тиббиёт маркази жаҳон стандартларига мос ҳолда қурилади. У ишга тушгач, 700 дан ортиқ иш ўрни яратилади.

Шунингдек, 130 нафар ўзбекистонлик шифокор Кореяда малака оширади, 32 нафар юқори малакали кореялик мутахассис мамлакатимизда фаолият бошлайди. Марказда йилига 8,5 минггача юрак-қон томир, трансплантология, нейрохирургия ва реабилитация билан боғлиқ юқори технологик жарроҳлик амалиётлари ўтказилиши режалаштирилган.

Эслатиб ўтамиз, 2020 йилда ҳам Корея Республикаси билан ҳамкорликда Болалар миллий тиббиёт маркази барпо этилган эди.