Тошкентда 30 сентябрь куни Европа Иттифоқининг икки тадбири бўлиб ўтади

Транскаспий транспорт йўлаги бўйича миллий конференция

Конференция соат 10:00 дан 17:00 гача InterContinental меҳмонхонасининг Амударё залида ўтказилади. Тадбир манзили: Шаҳрисабз кўчаси, 2-уй. Рўйхатдан ўтиш ва танишув қаҳва-танаффуси соат 09:30 дан бошланади.

Тадбирда давлат органлари, халқаро молия институтлари, тараққиёт ҳамкорлари ва хусусий сектор вакиллари иштирок этади.
Муҳокамалар марказида Транскаспий транспорт йўлагини ривожлантириш, инвестиция имкониятлари, шунингдек, транспорт ва ўзаро боғлиқлик соҳасидаги ислоҳотлар масалалари бўлади. Конференция Ўзбекистон Республикаси Транспорт вазирлиги ва Европа Комиссиясининг Халқаро шериклик бош дирекцияси ҳамраислигида ўтказилади.

«Европа тиллари куни — 2026»

Европа тиллари кунининг кундузги дастури соат 10:00 дан 13:00 гача Ўзбекистон давлат жаҳон тиллари университетида бўлиб ўтади. Дастур доирасида Европа тиллари тақдимотлари, қўшиқлар, ўйинлар ва викториналар ташкил этилади. Шунингдек, иштирокчиларни Европа мамлакатларининг тиллари ва маданияти билан таништирувчи «Тиллар ярмаркаси» ўтказилади.

Тадбирнинг кечки қисми — SpeakEasy Night соат 19:00 дан 21:30 гача Гёте-институтида, Амир Темур кўчаси, 42-уй манзилида бўлиб ўтади. Кечки дастурда қисқа метражли фильм намойиши ва муҳокамаси, тил столлари, интерактив ўйинлар, тезкор нетворкинг, маданий алмашинув ҳамда Европа мусиқалари ижросида DJ-сет режалаштирилган.

Оммавий ахборот воситалари вакиллари ҳар икки тадбирда иштирок этиш ва уларни ёритиш учун таклиф қилинмоқда.