Хоразмда кекса отасини моддий таъминламаган фарзандлар жиноий жазога тортилди

Хоразмда кекса отасини моддий таъминламаган уч фарзандга оид жиноят ишлари судда кўриб чиқилди. Kun.uz суд ҳукмлари билан танишди.

Суд ҳужжатларида келтирилишича, Боғот туманида яшовчи, 5 фарзанднинг отаси бўлган Х.Х. кексайганида қаровсиз қолган. У 2023 йил июл ойида фуқаролик ишлари бўйича Шовот туман судига фарзандларидан алимент тўловлари ундириш ҳақида ариза билан мурожаат қилган. Суд қарори билан отахоннинг моддий таъминоти учун фарзандларининг ҳар биридан ойлик 130 минг сўм қатъий суммада тўлов ундириш белгиланган. Аммо бир ўғли ва икки қизи ушбу алимент тўловини тўламай келган.

Х.Х. судда турмуш ўртоғи вафотидан сўнг фарзандлари уни ёлғиз ташлаб қўйганини билдирган.

“Ўзларининг фарзандлик бурчларини бажармади. Ахир уларни туғилганидан вояга етгунларига қадар парваришлаб, тарбиялаб келганман. Бироқ шундай бўлишига қарамасдан, мени кексайган ва соғлиғим ёмонлашган бир даврда ўз ҳолимга ташлаб қўйишди”, деган отахон судда.

Х.Х.нинг уч фарзанди белгиланган алиментни тўлашдан бўйин товлаб келган. Улар 2024 йил сентябр ойида маъмурий жазога тортилган. Аммо моддий ёрдамга муҳтож бўлган отасига алимент тўлашдан бўйин товлашда давом этишган. 2023 йил июлдан 2025 йил 1 июнгача бўлган даврда уларнинг ҳар бирида 2 млн 721 минг сўмдан тўланмаган алимент қарздорлиги юзага келган.

Ота суддан ушбу қарздорликни ундиришда амалий ёрдам сўраган. Жиноят ишлари бўйича Боғот туман суди ҳукмларига асосан фарзандлар Жиноят кодексининг 123-моддаси (ота-онани моддий таъминлашдан бўйин товлаш) 1-қисмида назарда тутилган жиноятни содир қилишда айбли деб топилган. Ўғил фарзанд ойлик иш ҳақининг 20 фоизи миқдорини давлат даромадига ушлаб қолган ҳолда 2 йил муддатга ахлоқ тузатиш ишлари жазосига тортилган. Икки қиз фарзанднинг ҳар бирига эса Жиноят кодексининг 57-моддасини қўллаган ҳолда БҲМнинг 20 баравари, яъни 7,5 млн сўмдан жарима жазоси тайинланган.

Маълумот учун, Жиноят кодексининг 123-моддасига кўра, вояга етган шахсларнинг меҳнатга лаёқатсиз ва моддий ёрдамга муҳтож бўлган ота-онани ёки уларнинг ўрнини босувчи шахсларни моддий таъминлашдан бўйин товлаши, яъни уларни моддий жиҳатдан таъминлаш учун суднинг ҳал қилув қарорига биноан ундирилиши лозим бўлган маблағни жами бўлиб икки ойдан ортиқ муддат мобайнида тўламаслиги шундай қилмиш учун маъмурий жазо қўлланганидан кейин содир этилган бўлса, 3 йилгача ахлоқ тузатиш ишлари ёки 1 йилгача озодликдан маҳрум қилиш билан жазоланади. Агар шахс алимент мажбуриятлари бўйича қарздорликни тўлиқ тўлаган бўлса, у жавобгарликдан озод қилинади.