Рамазон ойи муносабати билан муҳтожларга кенг кўламли ёрдам кўрсатилади

Бу ҳақда 16 февраль куни Президент Шавкат Мирзиёев раҳбарлигида ўтказилган йиғилишда маълум қилинди.

«Рамазон — меҳр-оқибат, бирлик ва шукроналик ойи» шиори остида ишлаб чиқилган комплекс дастур доирасида хайрия ва ижтимоий қўллаб-қувватлаш ишларига катта маблағлар йўналтирилмоқда.

Жумладан, жамоат хайрия фонди «Вақф» хайрия жамоат фондига 750 миллиард сўм, Миллий ижтимоий ҳимоя агентлиги орқали эса 300 миллиард сўм маблағ ажратилади.

Ажратилган маблағлар ҳисобидан:
• муҳтож оилаларга бир марталик моддий ёрдам кўрсатилади;
• ногиронлиги бўлган шахслар учун даволаниш ва жарроҳлик амалиётлари харажатлари қоплаб берилади.

Йиғилишда давлат раҳбари аёлларни бузғунчи ва ёт ғоялар таъсиридан ҳимоя қилиш масаласига алоҳида эътибор қаратди. Аёлларни маънавий ва моддий жиҳатдан қўллаб-қувватлаш, уларнинг жамиятдаги ўрни ва фаоллигини мустаҳкамлаш устувор вазифалардан бири экани таъкидланди.

Шунингдек, ахборот технологиялари орқали тарқалаётган радикал ва экстремистик ғояларга қарши курашишда фақат жазо ва тақиқлар билан чекланиб қолмаслик кераклиги қайд этилди. Бундай таъсирга тушиб қолган фуқароларни жамиятга қайта мослаштириш, улар билан индивидуал ишлаш, оилаларига ёрдам бериш, тиббий ва психологик кўмак кўрсатиш, касб-ҳунарга ўқитиш орқали бандлигини таъминлаш муҳимлиги урғуланди.

Президент ҳар бир маҳаллада муҳтож оилалар рўйхатини аниқ ва шаффоф шакллантириш, ёрдамни эса фуқароларнинг диний эътиқоди, миллати ёки ижтимоий келиб чиқишидан қатъи назар, тенг ва адолатли тақдим этиш зарурлигини алоҳида таъкидлади.

Рамазон ойида амалга оширилаётган мазкур ташаббуслар жамиятда меҳр-шафқат муҳитини янада мустаҳкамлашга хизмат қилиши кутилмоқда.