Шимолий Корея Курскни тиклаш учун Россияга ишчи юборади

Шойгунинг айтишича, Шимолий Кореядан Курск вилоятига минг нафар сапёр ва беш минг нафар ҳарбий қурувчи келади. Россияда Курск учун жангларда ҳалок бўлган КХДР аскарларига бағишланган ёдгорликлар очилади.

Россия Федерацияси Хавфсизлик кенгаши котиби, шунингдек, жорий сафарда асосий эътибор хавфсизлик масалаларини муҳокама қилишга қаратилганини таъкидлади.

Бундан ташқари, 17 июнь куни Шойгу Корея Меҳнат партияси Марказий ҳарбий қўмитаси раиси ўринбосари Пак Жонг Чон билан кенгайтирилган ишчи маслаҳатлашув учрашувларини ўтказди.

Эслатиб ўтамиз, февраль ойи бошида "Yonhap" ахборот агентлиги ҳам разведка маълумотларига таяниб, ишчи кучи танқислиги шароитида Пхенян минглаб ишчиларини Россияга юборгани ҳақида хабар берган эди.

Маълумот учун, Хавфсизлик кенгаши котиби Шойгунинг Шимолий Кореяга сўнги уч ой ичида учинчи маротаба ташрифидир. У охирги марта 4 июнь куни КХДРга келган эди.

2017 йилда БМТ барча давлатлардан Шимолий Корея ишчиларини ватанига қайтаришни ва келажакда уларни ишга олмасликни талаб қилувчи резолюцияни қабул қилди. Шимолий Корея қонунчилигига кўра, хориждаги шимолий кореяликлар иш ҳақининг 70 фоизини давлатга ўтказиши шарт, санкциялар шу билан боғлиқ. БМТ резолюциясида қайд этилишича, КХДР расмийлари бу даромадни ядро қуроли ва баллистик ракеталарни яратиш дастурларига сарфлайди.