Файзуллаев нега Еврокубокларда ўйнамаяпти?

Ўзбекистон миллий терма жамоаси етакчилари – Элдор Шомуродов ва Аббосбек Файзуллаев энди ҳамкорликда “Истанбул Башакшеҳир” жамоаси шарафини ҳимоя қилади.

Туркия чемпионати ҳали старт олишига бир неча кун бўлса-да, “Башакшеҳир” учун мавсум эртароқ бошланди. Ўтган мавсумда Суперлигани бешинчи ўринда якунлаган истанбулликлар халқаро майдонда Туркия шарафини ҳимоя қилишга киришди.

“Истанбул Башакшеҳир” УЕФА Конференциялар лигаси саралаш турнири иккинчи босқичида Болгариянинг “Черно Море” жамоаси билан иккита учрашувда куч синашиб, сафарда 1:0 ва ўз уйида 4:0 ҳисобида зафар қучди.

“Рома”дан кейинчалик тўлиқ трансфер қилиш ҳуқуқи билан ижарага олинган Элдор Шомуродовнинг янги клубидаги дастлабки икки ўйини айнан мана шу учрашувларга тўғри келди.

Шомуродов ҳозир учинчи босқич баҳсларига тайёргарлик кўрмоқда. “Истанбул Башакшеҳир” 7 ва 13 август кунлари Норвегиянинг “Викинг” жамоаси билан иккита ўйин ўтказади.

Ўзбекистонлик футбол ишқибозларини бошқа масала қизиқтирмоқда. “Башакшеҳир”га ўтгани бир неча кун бўлган Аббосбек Файзуллаев нега Конференциялар лигаси беллашувларига жалб қилинмаяпти? “Викинг” билан бўладиган ўйинда Файзуллаевни майдонда кўрамизми?

Бу саволларга россиялик журналист россиялик журналист Александр Троицкий ойдинлик киритди.

- Аббосга 14 августга қадар бўладиган ўйинларга тақиқ қўйилган. Норвегияликларга қарши бўладиган беллашувларда ҳам Файзуллаев ўйнамайди.

Биз “Истанбул Башакшеҳир” мусобақанинг кейинги босқичига чиқишига ва Аббос бу мавсум Еврокубокларда дебютини нишонлашига умид қилиб қоламиз, - деб ёзди Александр Троицкий.

Файзуллаевнинг собиқ клуби – ЦСКАнинг коммуникациялар бўйича директори Кирилл Брейдо тез кунларда “Истанбул Башакшеҳир” ўзбек футболчиси трансфери бўйича тўловларни охирига етказишини маълум қилди.

- Аббос Файзуллаевнинг трансфери бўйича клубни қониқтирадиган молиявий кафолатлар биз учун жуда муҳим эди ва музокаралар шундан келиб чиқиб ўтказилди. Тез орада “Истанбул Башакшеҳир” ЦСКА билан трансфер бўйича тўлиқ ҳисоб-китоб қилади. Биз Аббосга муваффақият ва футболдаги орзулари рўёбини кўришини тилаймиз.

Аббоснинг кетгани ҳужум чизиғини кучайтириш учун қидирув бошлашимизга сабаб бўлди. Оммавий ахборот воситаларида тарқатилаётган номлардан қайсидир бири  тўғри, бошқалари хато бериляпти. Айрим музокараларда анча олдинга силжиш бор, баъзилари секин кетяпти. Номзодлардан бир нечтаси ҳақидаги маълумотларни матбуотга сизишининг олди олинди. Лекин ҳужум кучайтирилиши аниқ, - деди Кирилл Брейдо.

Аббосбек Файзуллаев трансфери учун “Истанбул Башакшеҳир” 7,5 миллион евро бадал пули тўлаши келишилган. Бундан ташқари легионеримиз натижаларига қараб, икки ярим миллион евро бонус ҳам кўзда тутилган.

Турк клуби Файзуллаевнинг ўзи билан беш йиллик шартнома имзолаган. Экспертлар “Истанбул Башакшеҳир” ўзбекистонлик ҳужумкор футболчи учун келажакда Европанинг топ-лигаларига трамплин бўлади, деган фикрни илгари сурмоқда.