Toshkent shahar IIBB boshligʻi va prokuroriga «hayfsan» berildi: poytaxtda 800 dan ortiq jinoyat hisobdan yashirilgan

Prezident Shavkat Mirziyoyev boshchiligida oʻtkazilgan videoselektor yigʻilishida davlat rahbari poytaxt huquq-tartibot tizimida jiddiy kamchiliklar mavjudligini keskin tanqid qildi. Xususan, tergovchi va surishtiruvchilar malakasining yetishmasligi oqibatida oʻtgan yili 833 ta holat boʻyicha jinoyat ishi qoʻzgʻatilmay, hisobdan yashirilgani qayd etildi.

Rasmiy hisobotlarda jinoyatchilik kamaygani koʻrsatilganiga qaramay, shaharda 26 ta mahalla «qizil», 465 tasi esa «sariq» toifada qolmoqda. Mazkur holatlar asosida Ravshan Sultonxoʻjayev va Anvar Oʻrmonovga olti oylik sinov muddati tayinlandi. Agar ushbu davrda vaziyat ijobiy tomonga oʻzgarmasa, lavozimga loyiqlik masalasi qayta koʻrib chiqilishi maʼlum qilindi.

Yigʻilishda Toshkentning ayrim tumanlarida respublika miqyosida eng yuqori jinoyatchilik koʻrsatkichlari qayd etilgani taʼkidlandi. Xususan:

• Chilonzor tumani — oilaviy zoʻravonlik, talonchilik va bezorilik boʻyicha respublikada yetakchi;
• Yunusobod tumani — bosqinchilik holatlari boʻyicha eng yuqori koʻrsatkichga ega;
• Yashnobod va Mirobod tumanlarida qotillik jinoyatlari koʻp qayd etilgan;
• Olmazor tumani — qasddan tan jarohati yetkazish holatlari boʻyicha yetakchi;
• Shayxontohur tumani — talonchilik jinoyatlari eng koʻp qayd etilgan hudud sifatida tilga olindi.

Yuqorida sanab oʻtilgan besh tuman IIB boshliqlari toʻliq yangilandi. Yangi rahbarlar oldiga jinoyatchilikni keskin kamaytirish va tizimli chora-tadbirlarni amalga oshirish talabi qoʻyildi.

Shuningdek, shahar rahbarlarining faqat «mikroavtobusda aylanish» bilan cheklanib qolgani, tuman hokimlari va «mahalla yettiligi» bilan hamjihatlikda ishlamayotgani tanqid ostiga olindi. Taʼkidlanishicha, jamoatchilik bilan yaqin hamkorlik yoʻlga qoʻyilsa, poytaxtda yiliga 7,5 mingta jinoyatning oldini olish imkoni mavjud.