Toshkent viloyatidagi yopiq muassasalarda monitoring oʻtkazildi

Xususan, Nurafshon shahri, Toshkent tumani va Chirchiq shahri IIBning vaqtincha saqlash hibsxonalari (VSH), Toshkent, Chirchiq va Boʻka tumanlaridagi mastlik holatida boʻlgan shaxslarga tibbiy yordam koʻrsatish punktlari (hushyorxonalar), Boʻstonliq tumanidagi 7-sonli jazoni ijro etish koloniyasi, Chirchiq shahridagi 13-sonli jazoni ijro etish muassasasi, shuningdek, Olmaliq, Ohangaron shaharlari hamda Sergeli, Yangi Hayot, Ohangaron, Yuqori Chirchiq, Zangiota va Boʻka tumanlaridagi bir qator manzil-koloniyalar koʻzdan kechirildi.

Bundan tashqari, Zangiota tumanidagi 24-sonli tarbiya koloniyasi, Nurafshon shahridagi muayyan yashash joyiga ega boʻlmagan shaxslarni reabilitatsiya qilish markazi hamda maʼmuriy qamoqqa olingan shaxslar saqlanadigan maxsus qabulxona ham monitoringdan oʻtkazildi.

Tashriflar davomida muassasalardagi yotoqxonalar, yuvinish xonalari, oshxona, tibbiyot boʻlimlari, oziq-ovqat va dori-darmon saqlash joylari, kutubxona, madaniy dam olish xonalari, telefon orqali muloqot va uchrashuv xonalari, tergov va advokatlar xonalari, shuningdek videokuzatuv kameralari holati oʻrganildi.

Monitoring jarayonida ayrim kamchiliklar ham aniqlangan. Jumladan, 43 va 46-sonli manzil-koloniyalarning intizomiy boʻlinmalari, Nurafshon shahar va Toshkent tumani VSH hamda Boʻka tumani tibbiyot birlashmasi tarkibidagi hushyorxona taʼmirtalab holatda ekani maʼlum boʻlgan.

Shuningdek, 46-sonli manzil-koloniyasi intizomiy boʻlinmasida, Boʻka va Chirchiq tibbiyot birlashmalari tarkibidagi hushyorxonalarda issiqlik tizimi bilan bogʻliq muammolar kuzatilgan.

Nurafshon shahridagi muayyan yashash joyiga ega boʻlmagan shaxslarni reabilitatsiya qilish markazida esa xonalar harorati yetarli emasligi, ventilyatsiya hamda sanitariya-gigiyena talablariga rioya etilmagani qayd etilgan.

Boʻka tumanidagi hushyorxonada tibbiyot xonasidagi matraslar yaroqsiz holga kelgani, shaxslar joylashtiriladigan xonalarda esa eshiklar mavjud emasligi, faqat temir panjaralar oʻrnatilgani aniqlangan.

Monitoring natijalariga koʻra, aniqlangan kamchiliklarni bartaraf etish yuzasidan tegishli vazirlik va idoralarga Ombudsman tomonidan taʼsir choralari qoʻllash boʻyicha hujjatlar kiritildi.