200 кВт лимит: Жамоатчилик муносабати ва тармоқлардаги чиқишлар

Авваллари оддий аҳоли 201 кВт/соат электр ишлатиб 59 295 сўм тўлаган бўлса, 1 майдан бошлаб 180 900 сўм тўлаб келмоқда. Бу борада май ойининг бошида ҳам фуқароларнинг фикрини ўрганган эдик. Ўшанда баъзилар нарх ошганлигидан бехабарлигини айтса, яна баъзилар бутун дунёда ошаётганлиги сабаб бунга табиий жараён сифатида қараганди.

Ҳозирга келиб эса масала жамоатчилик орасида қизғин муҳокама қилинмоқда, хусусан Facebook ва Instagram'да лимитни бекор қилишни сўраб ҳатто челленжлар бошланиб кетган. Турли жамоатчилик фаоллари ҳам масалага муносабат билдиришмоқда.

Журналист-блогер Фотима Жўраеванинг 1 килограмм кўмирдан 8 киловатт электр ишлаб чиқарилиши ва у давлатга 53 сўмга тушиши ҳақидаги гаплари жамоатчилик орасида турли изоҳларга сабаб бўлмоқда. Шунингдек, блогер Қирғизистон ва Қозоғистондаги электр нархлари ҳақида ҳам гапирди. Яна кўплаб фуқаролар ўз норозилигини ижтимоий тармоқлар орқали билдирмоқда.

Paradigma.uz жамоаси ҳам масала юзасидан навбатдаги ижтимоий сўровни ўтказди.

2 ҳафта олдин Ҳудудий электр тармоқлари вакили матбуотга тармоқларда тарқалаётган эътирозлар ўринсиз эканлигини билдирган эди.

Шунга қарамай масала юзасидан фуқаро Мардон Субҳонов томонидан Вазирлар маҳкамасининг лимитларни жорий этиш ҳақидаги 2024 йил 16 апрелда қабул қилинган  “Ёқилғи-энергетика соҳасида бозор механизмларини жорий этишнинг қўшимча чора-тадбирлари тўғрисида”ги 204-сонли қарори устидан судга ариза киритилганди, аммо аризани кўриб чиқиш суд томонидан рад этилди.

Ўтган йилнинг декабрь ойида Энергетика вазири Жўрабек Махмудов жорий 2024 йилда ички эҳтиёж 100 фоиз қопланиши ҳақида гапирган эди.