Бухорода пора билан ушланган прокурор 15 йилга қамалди

Маълум бўлишича, Баҳодир Ғуломов Когон тумани прокурори вазифасида ишлаб келган. У мансабидан фойдаланиб фуқаронинг жуда кўп миқдордаги пул маблағларини қўлга киритиш мақсадида жорий йилнинг январь ойи бошларида Н.Н. ва хавфли рецидивист бўлган З.A. билан жиноий тил бириктирган. 

Шундан сўнг 3 нафар шерик Бухоро вилояти прокуратурасида ўта оғир жиноятларни тергов қилиш бўлими томонидан тергов ҳаракатлари олиб борилаётган “Когон ёғ - экстракция заводи” АЖ мансабдор шахсларига нисбатан жиноят иши бўйича жамият таъсисчиларидан бирининг ишончига кирган. Улар мазкур шахсларга айблов эълон қилмаслик масаласини Бухоро вилояти прокуратурасида ишловчи мансабдорлар орқали ҳал этиши мумкинлигини айтган. Ушбу ишни бажариш учун фуқародан 100 минг АҚШ доллари миқдорида пора олишга келишган. 

Кейинчалик  Ғуломов 2024 йил 15 январь куни Бухоро шаҳрида жойлашган “Турон” меҳмонхонаси олдида 100 минг АҚШ долларини жиноий шериги Н.Н. орқали олган. Шунингдек, у жиноий ҳаракатларини давом эттириб, “Когон ёғ - экстракция заводи” АЖга алоқадор шахсларни Бухоро вилоят прокуратурасида ишловчи мансабдор шахслар орқали терговга жалб қилмаслик ва жиноий жавобгарликка тортмаслик эвазига яна 100 минг АҚШ доллари миқдорида пора сўраган. Сўралган пулдан 44 минг АҚШ долларини қўлга киритган. Шундан 10 минг АҚШ долларини З.A. олиб, қолган 34 минг АҚШ долларини Н.Н. келгусида Баҳодир Ғуломовга бериш учун ўзида сақлаб қолган.

2024 йил 13 февраль куни Бухоро шаҳар марказий касалхонаси ёнида ўтказилган тезкор тадбирда Баҳодир Ғуломов Н.Н. орқали 56 минг АҚШ долларини олган вақтида далилий ашёлар билан ушланган. Тезкор тадбир давомида судланувчи Н.Н. "Cobalt" русумли машинасидан “Когон ёғ - экстракция заводи” АЖ мансабдор шахсларига нисбатан жиноят иши бўйича жамиятга алоқадор тўрт нафар шахсларни терговга жалб қилмаслик ва жиноий жавобгарликка тортмаслик эвазига сўралган 100 минг АҚШ доллари ҳисобидан 34 минг АҚШ доллари мавжудлиги аниқланиб, тегишли тартибда баённома асосида олиб қўйилган.

Суд мажлисида собиқ прокурор айбига иқрор бўлиб, қилмишидан чин кўнгилдан пушаймон эканлигини, давлат раҳбаридан кечирим сўрашини айтган. Кейин суддан ўзига нисбатан қонуний енгиллик беришни сўраган.

Суд ҳукми билан Баҳодир Ғуломов Жиноят кодексининг 168-моддаси 4-қисми “а” банди (жуда кўп миқдорда фирибгарлик), 28, 211-моддаси 3-қисми “а” бандида (жуда кўп миқдорда пора беришда иштирокчилик) назарда тутилган жиноятларни содир этганликда айбли деб топилган. Унга 3 йил муддатга прокуратура органлари тизимида ишлаш ҳуқуқидан маҳрум қилган ҳолда 15 йил муддатга озодликдан маҳрум қилиш жазоси тайинланган. 

Шунингдек, суд ҳукми билан Н.Н. 11 йил, хавфли рецидивист ҳисобланган З.A.га 12 йил муддатга озодликдан маҳрум қилиш жазоси берилган.