Аҳоли мурожаатлари назорати кучайтирилади: янги тартиб тасдиқланди

Президент фармонига кўра, 2026 йил 1 майдан бошлаб мурожаатларни кўриб чиқиш ва назорат қилиш бўйича янги тартиб жорий этилади.

Янги қоидаларга мувофиқ, Ўзбекистон Республикаси Президенти Виртуал қабулхонаси ахборот тизимида мурожаатлар ижроси реал вақт режимида назорат қилинади. Агар мурожаат белгиланган муддатда кўриб чиқилмаса, у автоматик равишда юқори турувчи давлат органига ўтказилади.

Шунингдек, мурожаатлар мазмунига қараб “шошилинч”, “одатий” ва “маслаҳат талаб қилувчи” тоифаларга ажратилади. Назоратга қайтарилган мурожаатлар эса 3 иш куни ичида юқори органлар томонидан қайта кўриб чиқилади.

Янги тартиб доирасида:

• давлат органлари ва ташкилотлари раҳбарлари аҳоли мурожаатлари бўйича ҳар чоракда камида бир марта ҳисобот беради;
• ушбу ҳисоботлар парламент палаталари ҳамда маҳаллий кенгашларда эшитиб борилади;
• ахборот хизматлари Халқ қабулхоналари билан ҳамкорликда мурожаатлар билан ишлаш ҳолатини ёритади;
• ОАВ ва ижтимоий тармоқлардаги мурожаатларга оид эътирозлар ҳам мунтазам ўрганиб борилади.

Мазкур ўзгаришлар аҳоли мурожаатларини тезкор ва самарали ҳал этиш, шунингдек, давлат органлари масъулиятини оширишга қаратилган.