Бухорода зўравонликка учраган аёллар масаласи кўтарилди: 3 нафар мурожаатчи ҳимояга олинди

“Тенглик ва ҳурмат” платформаси доирасида Бухоро вилоятида зўравонликка учраган аёллар билан боғлиқ ҳолатлар ўрганилди. Олий Мажлиснинг Инсон ҳуқуқлари бўйича вакили (омбудсман)нинг ҳудудий вакили ҳамда ҳамкор ташкилотлар иштирокида Аёлларни реабилитация қилиш ва мослаштириш марказида бўлган 3 нафар аёлнинг мурожаатлари кўриб чиқилди.

Ўрганишлар давомида асосий муаммо сифатида ушбу аёлларнинг марказдан чиққанидан кейинги яшаш жойи масаласи долзарб экани аниқланди. Шу муносабат билан тегишли туман ҳокимликларига ижтимоий турар жой ажратиш масаласини кўриб чиқиш, прокуратура органлари билан эса тазйиқ ҳолатлари юзасидан қонуний чоралар кўриш вазифалари белгиланди.

Маълум қилинишича, “Тенглик ва ҳурмат” платформаси доирасида бундай ўрганиш ва мулоқотлар республика бўйлаб давом этмоқда. Бу жараён нафақат жабрланган аёлларни ҳуқуқий, ижтимоий ва психологик жиҳатдан қўллаб-қувватлаш, балки зўравонликка йўл қўйган шахслар билан ҳам профилактик ишлар олиб боришни назарда тутади.

Бу каби чоралар орқали қайта зўравонлик ҳолатларининг олдини олиш ва оилавий муносабатларда ҳурмат муҳитини шакллантириш мақсад қилинган.